يوم .. بس مش زي أي يوم

صحيت الصبح الساعة ال6 صباحا .. على غير العادة .. وبالرغم من اني نايمة الساعة ال4 فجرا

ربنا ما يوريكم ولا يكتبها على حد منكم .. كان عندي قوافل بيطرية

اه منا في طب بيطري بس كلها كام شهر وابقى في الشارع .. أتخرج يعني

المهم صحيت ونزلنا ركبنا الاتوبيس .. وانطلق بينا الى بلاد الواء الواء .. أو على ما يبدو لي أنها بلاد الواء الواء

بلاد معظمها لا تقريبا كلها مش موجود على الخريطة .. كمان الخدمات والمرافق مش اد كدا

طيب مش قضيتنا

نزلت عربية تلف البلد .. يا أهالي البلد الكرام .. في قافلة بيطرية منورة عندكم .. كل اللي عنده حيوانات تعبانة يجيبها

مفيش ثواني .. والحالات ابتدت تهل

وطبعا احنا معسكرين في وسعاية كدا جمب الغيط ومتقسمين مجموعات .. ديه باطنة .. ديه ولادة .. جراحة .. وهكذا .. ولابسين البلاطي وشكلنا يفرح يعني

أنا باة كنت في مجموعة الوقاية خير من العلاج .. يعني كل مهمتنا تتلخص في رش الحيوانات اللي عندها جرب .. واللي عندها حشرات

ومعظمها كانت سليمة .. بس كتطبيق للمثل القائل .. أبو بلاش كتر منه

فده كان شغل خفيف .. وكنت فاضية وكانت فرصة كويسة امارس هوايتي المفضلة في متابعة الناس وتسجيل سلوكياتهم

أول حاجة تعامل الطلبة مع الفلاحين .. أو خلينا نعممها ونقول تعاملنا كافراد مع مجتمعات مختلفة عنا

ندي مثال : مجموعة طلبة بنات وولاد واقفين مع بعض وبيهزروا ويضحكوا وفاتحينها على الرابع

طبعا ديه كانت فرصة كويسة لاصحاب الحالات انهم يرموا كلام مش ظريف .. او انهم يتجاوزوا الحدود مع الطلبة البنات

فطبعا أنا كفرد حتى لو مقتنع باللي بعمله .. انا مش عايش لوحدي .. لازم اراعي المجتمع اللي حوالية بافكارة ومعتقداته

حاجة تانية ..وهي مهارة التعامل مع الناس .. شئ اد ايه مهم وصعب

مهم أوي الناس تاخد عني انطباع كويس .. مش بس اني شاكرة في الشغل

ممكن اكون شاطرة اوي في شغلي .. بس اتعاملت غلط .. بتعالي او سمحت بتجاوز للحدود

ممكن اكون مش بفهم اي شئ واتعاملت بذكاء

مثال : انهاردة مثلا كنا بنرش محلول في مياة بتركيز معين .. المحلول ده خلص .. طيب ايه العمل لو قلنا خلاص شطبنا ايه المنظر

قال للعامل قضيها مياة وخلاص

وكل ما ييجي حد .. والله يا حاج انت ابن حلال خلاص دا احنا يا دوب بنخلص .. والناس ماشية تدعيله وربنا يجيب الشفا على ايديك يا دكتور ووووووووووو

نظرة الناس للبنت اللي بتشتغل طبيبة بيطرية .. حتى البنات نفسهم اللي في المكان

طبعا مش مقتنعين بيها اطلاقا

ده غير الكلام من نوعية .. ياريتني كنت حمار علشان الدكتورة تكشف عليا

يااااااا اكيد طبعا خفيتي يا حلوة لما الدكتورة كشفت عليكي .. ده لمعزة

مش عارفة ده بيعكس نظرتهم للبنت وشغلها ولا انا اللي مكبرة المواضيع

الأطفال الموجودين وتأثير المكان عليهم

تلاقي عيل مكملش 3 سنين .. وساحب معزة وجاي .. وواحد تاني شايل فرختين وجاي

لو كلمته كلمة مش عاجباه ممكن تلاقي كورس شتايم اتفتح

وتلاقي العيل من دول ماشي حافي في التراب والارف .. وماشاء الله ربنا مباركله في صحته

انما لو بصيت لولد من بتوعنا .. من اللي بيخافوا يلمسوا القطة

ويشربوا اللبن الصبح .. ويلعبوا في النادي

ولو سهروا للساعة 11 تجيلهم نزلة معوية

ااااااااه انا شكلي هيست

بس كنت هتجنن واطلع شوية من الزحمة اللي في دماغي

يلا .. اروح أروق الجي بأة