كبسولات

كبسولات مش زي بتاعت استاذنا سمير رجب .. انا فين وهو فين يعني

:D

بس هو شوية كلام في دماغي مش مترتب ومالوش علاقة ببعضه

طبعا كل سنة وانتم طيبين وعيد سعيد عليكم يارب وكلوا لحمة بس مش كتير بأة

كان نفسي اكتبلكم قبل انهاردة علشان انهاردة وقفة عرفات وكان نفسي تدعولي كلكم

بس معلش اللي يقرا بردو أمانة الدعاء

:)

****************

من يومين بقلب في التليفزيون والريموت - هو السبب - وداني على قناة

الفضائية اللبنانية LBC الــ

وكان عليها برنامج اسمه هزي يا نواعم .. طبعا واضح من اسم البرنامج الدور الريادي العظيم القيادي اللي بيقدمه وكل الكلام الجامد ده

دلوقتي بس عرفت اللبنانيين مش كانوا عارفين يختاروا رئيس ليه

اتاريهم كانوا مشغولين بيختاروا حاجة تانية

على العموم مش فارقة كله رقص

****************

في الكلية عندنا مزهقينا بان مرض حمى الوادي المتصدع قادم وبشدة في الصيف من السودان

وانه هيسبب خساير مهولة في الحيوانات وفي البني ادمين اللي هم احنا كدا

حاجة كدا على غرار انفلونزا الطيور

وافتح الجورنال من يومين بردو والاقي خبر بالبونت العريض

خفض الدعم المخصص لامصال مرض حمى الوادي المتصدع من 35 مليون الى 10 مليون جنيه

بصراحة لا تعليق

******************

الفترة اللي فاتت كان موضوع رغيف العيش وان الدعم هيتشال من عليه هو الشاغل الاكبر .. المصيبة ان عندنا في المنوفية الدقيق كان بايظ وصلاحيته منتهية فلو وصفت منظر العيش اللي لو اترمى لكلاب اعتقد هتقرف تاكله هبقى بجمل صورته

والغريب اكتر منظر الناس على افران العيش اللي بالمنظر ده لدرجة ان الناس بتجيبة بالواسطة

بجد حزينة اننا وصلنا لمرحلة العيش الحاف مش لاقيينه

فكرت لو اصحاب الافران والمخابز يعملوا اعتصام يوم واحد بس بجملة هوجة الاعتصامات اللي في البلد

كان هيبقى ايه الوضع

بس عقلي كان عاجز عن تخيل المنظر

*****************

في النهاية كل سنة وانتم طيبين

شلن فضة

ركنت العربية جمب الرصيف ونزلت منها فتاة في مطلع العشرينيات

سلام نشوفك بكرة

سلام

وبتعدي الشارع في أمان الله وعينها لمحت على الارض حاجة فضة مدورة متناهية في الاصغر والصدأ بدأ يزحف عليها

كملت طريقها عادي جدا لبيتها وفي الطريق ابتدا الحوار

ده شلن

غريبة .. بأة الناس الكتير ديه كلها محدش شافه

طيب انا ليه مخدتوش أنا كمان

!!!!!؟؟؟؟؟؟

وصلت بيتها وموضوع الشلن ده شاغل بالها جدا

قعدت مسترخية بتحاول تفتكر ذكرياتها مع الشلن وغمضت عينها

بس مفيش فايدة مفيش اي حاجة من ذكرياتها بتطلع

جربت تاني

بردو مفيش فايدة .. الصورة بلاك قدامها

غمضت تاني وشكل عينها المرادي يديلك ايحاء انها بتحارب جوة صندوق ذكرياتها وعمالة تقلب جوة علشان تلاقي اي ذكرى للشلن ده

أهو .. أخيرا في حاجة بدأت تظهر

صورة أطفال بيلعبوا في الشارع

وواحد منهم لمح بعينه شلن .. اعد يرسم ويتكتك ويتحرك بمنتهى الهدوء لحد ما وصل جمبه

وحط رجله عليه .. وصرف نظر باقي اصحابه لحاجة تانية

الحقوا ايه اللي هناك ده

وبسرعة ايدة لقطت الشلن من على الأرض

هيييييييييه لقيت شلن

لأ أنا اللي شفته قبلك وكنت ناوي اخده

لا ماليش دعوة انا اللي خدته

وعلشان هي تعبت أوي علشان توصل للصورة ديه .. راحت في النوم

وصحيت تاني يوم .. وسبحان الله

لقت الشلن مرمي مكانه على الأرض

المرادي مسابتوش ومشيت زي المرة اللي فاتت

خدته وحطته في جيبها وقررت الاحتفاظ بيه

بعد ما روحت البيت بتفتح العلبة اللي بتجمع كل ما هو متعلق بذكرياتها

بس للأسف بتمد ايدها في جيبها .. ملقتش الشلن

حد فهم حاجة

فهم كينونة الشلن متروك لخيالكم

تحياتي

!! انتحار البحث العلمي وولادة المشروع النووي

خبر استوقفني من يومين

بصراحة انا شايفاه مأساوي لأبعد درجة

وهو

انتحار معيد بكلية العلوم لعدم استطاعته الإنفاق علي أبحاثه

شهد مركز المراغة بسوهاج مأساة انسانية. انتحر معيد بكلية العلوم تناول مادة شديدة السمية بسب عجز أسرته عن تدبير نفقات المعيشة وتدبير مبالغ للانفاق علي أبحاثه. تم نقل الجثة للمستشفي المركزي واخطار أحمد الشناوي مدير النيابة فأمر بانتداب الطبيب الشرعي لتشريح الجثة لبيان سبب الوفاة وتولي التحقيق. كان اللواء أحمد عبدالوهاب مدير أمن سوهاج قد تلقي بلاغا من العميد محمد اسماعيل مأمور مركز المراغة يفيد بانتحار عابدين علي محمد فرج الله- 26 سنة-معيد بكلية العلوم بأسيوط من قرية الشيخ شبل وأن تقرير مفتش الصحة أكد ان سبب الوفاة تناوله مادة سامة. تم تشكيل فريق بحث اشرف عليه اللواء بكري الصوفي مدير المباحث ضم الرائد احمد صلاح رئيس مباحث المراغة، وتبين بأن والد المنتحر يعمل بائع فاكهة بالقاهرة ويمتلك 6 قراريط من الارض وأن والدته تقوم كل عام ببيع جزء من الارض وتخصيصه للمنتحر للانفاق منه علي ابحاثه ويوم الحادث طلب من والدته مبلغ 1300 جنيه للسفر الي الغردقة مع زملائه بقسم الحيوان لشراء قواقع لاعداد ابحاثه فعجزت عن تدبير المبلغ وقامت باستدانة مبلغ 400 جنيه فقط من أهل الخير، وتحت فشل الاسرة عن تدبير نفقات المعيشة وتدبير مبالغ للانفاق علي ابحاثه فقرر الانتحار وصعد الي حجرته وتناول مادة سامة يستخدمها في أبحاثه ولقي مصرعه. تم التحفظ علي المادة لاسامة ونقل الجثة للمستشفي واخطار النيابة فتولت التحقيق.

خلص الخبر .. بس مخلصش الكلام

أد كدا البحث العلمي في مصر بأة حاله يحزن ويموت .. طبعا هو نقص ايمان من الشخص المنتحر .. بس مش ده موضوعنا

ربنا يرحمه

خلاص مصطلح " البحث العلمي " مبقاش ليه أي موقع من الاعراب في مصر

الغريب انه مع انتحار الباحثين علشان مش قادرين يصرفوا على ابحاثهم

ومع شكاوي الناس المستمرة .. من الغلاء الفظيع في الاسعار

وغيره وغيره

نجد الرئيس مبارك يعلن منذ ايام عن المشروع النووي المصري

بعد ما اطلعت على الفقرة السابقة من فضلك اجب على الاتي

ماهي العلاقة بين انهيار البحث العلمى - أو بالاحرى انتحاره - وبين دخول مصر مشروعها النووي ؟

هو يعني المشروع النووي ده ببلاش ومش محتاج أبحاث ؟

اقرا الاحداث التالية علشان تجاوب على السؤال

اعلان جمال مبارك عن المشروع النووي - يليها بيع أرض الضبعة التي كان من المقرر اقامة المشروع عليها

( قاللك نووي ايه يا جدع .. مش هيأكلنا عيش .. نقلبها متجعات فرفشة والذي منه )

وبعدين اعلان الرئيس مبارك عن استئناف المشروع

ها قريت

طيب .. اين سوف يقام المشروع ؟؟

(من غير مقاطعة ان شاء الله )

طويب سؤال كمان

هلللللل توجد دلالة للتوقيت اللي تم فيه الاعلان عن المشروع خااااااصة بعد توقيع اتفاق بين الاردن وعدة دول غربية لانشاء مفاعل نووي .. وكذلك اليمن والجزائر ؟؟

طيب هللللللل سيسمح لمصر بتخصيب اليورانيوم ولا هتستوردة ؟؟

اللي عنده اجابة

يبعت على ص.ب 115

: تحديث

جاتلنا اجابة من المواطن

kareem sadek

البورنامج النووي بتاعنا يا جدعان زي بورنامج الفضاء بتاعنا كده ....من بره بره علي طول كده...تعمله فرنسا او امريكا و ياخدوا خمسين واحد يدربوهم هناك يويجوا شغلوا المفاعل و المحطة...ماله بقي الموضوع بالبحث العلمي و الحركات دي ؟؟:Dو بعدين يا عبير دا برستيج للريس بتاعنا...يعني يرضيكي احمدي نجاد اللي عربيتة بيجو 75 المهندس الغلبان عمدة طهران السابق....يبقي عنده سلسلة محطات نووية و بيخصب اليوراينيوم بنسب صناعية و الريس بتاعنا مش يبقي عنده حتي محطة بلاستيك جايبهاله عمو "ساركوزي "..,في عيد ميلاد جيمي ال45...بلاش نق بقي يا جدعان علي الخلق و سيبوهم يعيشوا!!

نسيت اقولكم يا جماعة ان العنوان كان ص.ب 115 لاظوغلي

:)

تحديث كمان

واضح ان الناس متعظتش للي حصل للمواطن اللي اجاباته وصلت ل لاظوغلي

:) بس ما باليد حيلة

محمد العدوي

هنزرع نخل ونلم نواه علشان المشروع النووي دا . وبعدين نحرقه ونتدفى بيه في الشتا .. أظن دا اللي كان قصدهم عليه ، حيث ان ثروة مصر من النخيل مش عارف كام نخلة على الطريق الزراعي إلى كوم البلح . لكن بقى انا مش عارف ايه علاقة انتحار الباحث دا بالبحث العلمي في مصر . هو باحث دي مش يعني حد راسي ودماغه موزونة وعنده حلول وبدايل . . ينتحر علشان حبة قواقع . ليه يعني . واسعة حبتين . البحث العلمي مشاكله كتيرة ميحلهاش إلا إيمان حقيقي ورغبة حقيقية لا توقفها كل العقبات التي نتفنن في وضعها .. محدش يستنى الوضع الاقتصادي لما يتصلح لأنه مش هيتصلح . . طبعا دا مش مطلوب من كل باحث ، الناس عاوزة تاكل ودا حقها . لكن هناك دوما ناس عاوزة حاجة تانية غير الأكل . قلة . لكنهم هم من يفعلون . هم فين دول بقى.. قبل كدة فين ثقافة البحث العلمي أصلا فينا إذا كنا بندور على أحقر ورق نقرا منه قبل الامتحان . و كل المكتبات اللي حوالين الجامعات تشهد على ذلك . الرغبة عادة لا يوقفها اي شيء . ولما تكون مش موجودة نبحث بقى عن المعوقات .

اعتقالات الطلبة

مشهد داخلي : واقفة انا وبابا في الكوريدور بتاع الشقة ( الطرقة يعني ) .. وبنتكلم

اب وبنته بأة وكدا

ها يا بابا بأة

يا بنتي بطلي صداع

يا بابا ......

وفجأة حسيت ان الارض بتترج .. ايه الوش ده

ياربي .. البيت بيقع ولا ايه

ربنا يستر ..

ولقيت كل اللي في البيت بيجري على الشباك والبلكونة

جريت انا كمان

بجد اتصدمت من اللي شفته

ايه كميات عساكر الامن المركزي ديه .. وايه العدد المهول بتاع العربيات ده

العساكر منتشرة في الشارع زي الدبان .. وقافلين الشارع .. وطايحين بالعصيان في كل اللي ماشي

ومسكو تاكسي يا عيني دشدشوه لما حاول يتحرك

معلش نسيت اقولكم انا كنت فين .. لا مش كنت على الحدود ولا حاجة

ولا في قلب غزة مثلا او مستعمرة في فيتنام

لا لا لا

انا كنت جمب مجمع الكليات النظري جامعة المنوفية

واللي حصل ده حصل لطلبة الكلية .. علشان ارتكبوا جرم بشع الا وهو ممارسة حقهم في طلب الحرية المزعومة

حرية انتخابات اتحاد الطلبة

اعترضوا على التفتيش المهين على البوابة

اعترضوا على حبس اساتذتهم في الجامعه

وعلى خطف زمايلهم الطلبة

اه يا جماعة متستغربوش احنا في 2007 .. مش في القاهرة 30 والقلم السياسي هو اللي بيعمل كدا

لما ابقى واقفة في بلكونة بيتنا .. والاقي الطلبة بتجري من جوة المجمع .. ووراهم كام مخبر من اللي هما .. يرنوهم العلقة اللي هي

وبعدين ياخدوهم في عربيات .. ده يبقى اسمه ايه

لما البنات تيجي تدخل كلياتها .. وشنطها تتفتش بطريقة في منتهى السفالة .. ده يبقى اسمه ايه

لما اقف مع بنت لابسة خمار .. واتشد علشان الوقفة معاها بقت شبهة .. ده يبقى اسمه ايه

والله مش عارفة اقول ايه ولا ايه .. بس المشهد كان يصدم بجد

واللي يصدمك اكتر .. ان ده كله شغال

والكافيتيريا اللي تحت .. الشباب والبنات زي ما هم عااااااااادي

يا عم سيبك اللي يولع يولع

الشباب اللي بيتظاهروا ماسكين نعش للحرية .. وواقفين حداد

والشباب الروش معدي جمبهم .. ايه ده هي الحرية ماتت .. محدش قاللي والله

!!!!!!!!!!!!!!!!!

واللي ماسك ايد واحدة وقاعدين يسبلوا

المشهدين كانوا في نفس اللحظة .. وتقريبا في نفس المكان مش بيفصل منهم غير كام متر

والغريب ان الاتنين عايشين في البلد ديه

حاجة تحزن والله

كان نفسي اجيب صور .. بس انا كنت واقفة بتفرج مش مستوعبة في ايه

بس هحاول اجيب قريب من الناس اللي صورت

ديه صور من اخوان اون لاين مؤقتا

baaaaaaaaaaaack

السلامُ عليكم

الحمد لله أخيرا بعد طول عذاب مع شركة النت .. رضيوا عني ووصلوه تاني
وان شاء الله هرجع أزهقكم من تاني

بجد وحشتوني جدا .. مش عارفة اقول مين ولا مين .. خايفة انسى اسم حد
متشكرة جدااا لكل اللي سأل عليا .. هنا أو على الميل
ربنا يخلليكم دايما .. وتسالوا عليا
:)

رمضان بتاع زمان

• اولا عايزة اقولكم حجم الماساه اللي انا فيها علشان اجي اقولكم كل سنة وانتم طيبين ووحشتوني جدا

بعد البحث والتحري على سايبرات البلد علشان الاقي سايببر

محترم قريب من البيت والمكان واسع .. لاني طبعا واقعة تحت ذل شركة الكومبيوتر اللي بغيرها .. ومش عارفة النت ناوي يرجع امتى ان شاء الله

المهم بعد الرغي ده ندخل في الموضوع

كل سنة وانتم طيبين

ورمضان كريم

:)

بعد ما عدا 10 ايام من رمضان .. بحاول استرجع ظاهرة واحدة من اللي كنا بنعملها زمان مفيش

حاسة ان كل ما الزمن بيعدي بينا كل ما المظاهر بتختفي او احساسنا بيهل بينعدم .. مش عارفة والله

بس فين لما كنا بنستعد من قبلها بكم يوم .. ونطلع انا وولاد عمي فوق السطح ونجيب الكراسات والكتب القديمة والمقصات .. وتيتا تحت بتعمللنا النشا اللي هنلزق بيه .. ده كله طبعا من ورا مامتنا لانها مش بتبقى موافقة منعا للبهدلة ..

ونجيب الخيط الطويل ونربطه من اول السطح لاخره ونعد نقص ونلزق ونسيبه علشان ينشف ونعمل فروع كتيرة وننزل نعلقها في الشارع وعلى البيت ... ياااااااااه

وبعدين جري ننزل نتجمع في بيت جدي مع كميات البلح .. علشان نعبيها في اكياس صغيرة وتتوزع قبل المغرب على الناس في الشارع وفي المسجد .. العيلة كلها متجمعة اهي .. اللي بيعبي واللي بيدبس واللي بياكل

وليلة رمضان جدي ياخدنا يشتريلنا الفانوس

فانوس صغير بلاستيك .. كل امكانياته لمبة صغيرة .. صحيح يا كان مصيرها انها بتتحرق او بتتكسر بس كان حلو اوي وحاسين بالفرحة بيه

ننزل نلعب في الشارع ونغني حاللو يا حاللو .. رمضان كريم يا حاللو

نفطر مع بعض طول الشهر الكريم ..

الله ايه ده ده المدفع هيضرب .. جري عمو ياخدنا بالعربية نروح نتفرج على الراجل وهو بيضرب المدفع .. واحنا حاطين ايدنا علة ودننا وفرحانين اوي

وبسرعة نرجع على ميعاد الفطار .. طبعا مستنيين بنتسلى بسرقة الاكل من المطبخ لحد ما جدو وبابا يرجعوا من صلاة المغرب من المسجد

بعد الاكل نتخانق مين اللي هيشيل ومين اللي هيغسل

زبسرعة نجري على التليفزيون .. نتفرج على الفوازير والف ليلة وليلة

وساعات كنا نروح نصللي التراويح ونرجع رجلنا متكسرة

بس مبسوطين

اصحى يا نايم يا نايم اصحى

ايه ده

ده عم حسب الله المسحراتي .. الراجل الجميل بجلابيته وطبلته .. ماشي في الشارع بينادي على اسامينا علشان نصحى .. اسامينا اللي مكتوبة على البيت

يااااااه .. كنت بحبه اوي

مره حدفتله ربع جنيه من البلكونة علشان يغنيلي شوية ..

اعد يغني بتاع 10 دقايق .. طبعا مش فاكرة حاجة من كلامه غير

يا عبير يا نور الصباح يا عقد لولي في الملاح باين

دلوقتي .. عم حسب الله مات .. وابنه ورث الشغلانة عنه باة يعدي بعجله يخطف الاسامي كان حد بيجري وراه

وبعدين اختفى .. مبقاش يعدي غير اول يوم رمضان واول يوم العيد علشان ياخد الكحك اجباري ويا ويلة اللي ميديلوش الكحك

ومش عارفة اذا كان بييجي لسة ولا خلاص هو كمان ..

علشان سيبنا البيت

وجدي توفى .. ومبقناش نتجمع زي زمان

بنشوف بعض في المناسبات

وكل ما ييجي رمضان .. اقول ..

قول للزمان

رمضان كريم

وكل سنة وانتم طيبين

أي كلام

حتى هذه اللحظة لم أتعرض لأي اغراء .. ليس امامي ما يُسرق .. وانا لا املك الحكم على حراس المرمى الذين لم يتعرضوا لكرة واحدة طيلة المباراة

لقد تعلمت أن كل انسان يقضي حياته في الفخر بأنه لم يقترف ذنبا .. فالحقيقة هي أن نطاق حياته بعيد عن أي فرصة لاقتراف الذنوب

فاذا اتيحت له الفرصة .. حسن .. انتي تعرفين من اين ياتي اللصوص والمختلسون والقتلة انهم من بيننا .. انهم نحن

هؤلاء اشخاص وجدوا الفرصة كاملة فادركوا انهم اضعف مما تصوروا .. ادركوا انهم لم يكونوا قط شامخي الاخلاق كما حسبوا

أنا لم اتعرض لاي اغراء واعتقادي الخاص انني ساقاوم وقتها وان تربيتي القويمة ستصمد لكن من يدري ؟ إن الغراء لمغر بحق .. وعندنا في مصر نقول ( الشيطان شاطر ) .. ضعي عشرة رجال ممن يتشدقون بنبل الخلق والرفعة في موقف يسمح بالفساد .. ولكن اكدي لهم ؟أولا ان لا خطر عليهم على الاطلاق .. ما سيفعلون هو سر بينهم وبين ضمائرهم .. ثم راقبي نتيجة التجربة

أعتقد ان اثنين من العشرة لا اكثر سيبرهنون بحق على انهم نبلاء ...

أنا اعرف انني ( ساحاول ) أن اصمد ومن يدري ؟ لربما لعبت تربيتي دورا وقتها

ثمة مقولة عندنا في مصر معتاها ( من لم يشبع على مائدة أبيه فلن يشبع للابد ) وأنا شبعت على مائدة أبي بالتاكيد

لكني ادعوا الله صادقا ألا يضعني في موقف أتعرض فيه لاغراء

د.احمد خالد توفيق

ده باختصار شديد اللي بيدور جوايا .. مبقتش قادرة افهم نفسي .. انا جوايا كويس ولا جوايا وحش

انا لسة متعرضتش للحياة وللمواقف اللي بجد اللي بتبين مبادئنا ديه فعلا متاصلة جوانا ومتمسكين بيها .. ولا مجرد شعارات

بس على الاقل اتعرضت لمواقف .. نتج عنها حاجة زي الصراع النفسي جوايا .. بين الصح وبين الغلط .. حتى لو الصراع ده للحظات

مش عارفة .. ايه رأيكم في الكلام الملخبط ده

صباح النفاق

أكد الرئيس مبارك أنه لا تهاون ولا تراخي عن مواجهة القلة التي تحاول الإثارة أو تشويه الانجازات التي حققها الشعب المصري بجهده وعرقه‏.‏ وأضاف أن الحرية لا تعني الفوضي أو التسيب أو محاولة فرض الرأي بالقوة‏.‏ وفي تقديري أن الرئيس مبارك بهذه الكلمات أراد أن يعيد تأكيد ما سبق وأعلنه مرات عديدة من أن الاستقرار شرط ضروري لمواصلة عملية الإصلاح والتغيير‏,‏ وأن هناك انجازات تتحقق علي نحو متواصل‏,‏ صحيح أن إحساس المواطن العادي بها يستغرق بعض الوقت إلا أننا نلمس جميعا هذه الانجازات‏.‏

الله عليه والله .. فعلا المواطن العادي السينس عنده متأخر شويتين .. لازم يبقى سوبر مواطن علشان يحس على دمه

بصراحة المقال أثر فيا جدا .. وحسيت اني بفتقد للسينس ده ..

خاصة بعد زيارتي لبنت عمي في المستشفى اللي بتشتغل فيها .. وهي مستشفى تابعة للتامين الصحي

واكتشفت انها مقفولة بامر من وزير الصحة من حوالي شهرين .. لاكتشافه مخالفات في المستشفى لدرجة ان اخر مرة 5 مرضى ماتوا في العمليات بسبب اكتشافهم ان جهاز النيترو بايظ

طبعا سيبكم من ده كله ان مفيش دكتور ولا مسئول اتحاسب

كل اللي عملوه ان المستشفى اتقفلت .. وده حصل قبل كدا تقريبا في مستشفى النيل في شبرا بس حد ابن حلال اتبرع ب 2 مليون جنيه والمستشفى اتفتحت تاني

اللي عرفته .. ان ديه مقدمة لحاجة كدا زي خصخصة التأمين الصحي

يعني عايزين يثبتوا ان التأمين الصحي مش قادر على ادارة المستشفيات ديه .. فهتتولى ادارتها الشركة القابضة .. هيخصخصوه هو كمان يعني

يلا اشمعنى هو يعني ما كل حاجة في البلد بتتباع حتى البنوك .. مش بعيد نلاقي نفسنا احنا كمان متخصخصين الصبح

درس خصوصي في بيتنا .. لطفل في أولى ابتدائي .. اه ما هي كمان بيتاخد فيها دروس

وبيكتبله في الكراسة .. أنا ماجد

طيب بس انا مش ماجد يا استاذ

اكتب وانت ساكت

المرة اللي بعدها

انا بسمة

يا استاذ ازاي .. انا ولد

اسمع الكلام وبطل لماضة

انا احب أمي

وبابا لأة

انت اصلا لمض ومبتسمعش لكلام .. لو مسمعتش الكلام هتنضرب

ادي نظام التعليم العقيم اللي من ايام فحت البحر ولسة ماشيين بيه .. مش مستوعبين ان ده طفل بيتفرج على تليفزيون

بيلعب على كومبيوتر ..

دماغه غير الدماغ الاثرية بتاعت زمان

اييييييييه يلا معلش

اه حاجة كمان من وحي المقال بما اننا شعب فقري اصلا ومش وش نعمة .. نفسي علاوة يوليو ديه تتلغي

يارب تتلغي .. قولوا امين

كل سنة .. الكام جنيه اللي الموظف الغلبان بياخدهم .. وفي المقابل الاسعار بتتضاعف مرتين وتلاتة

واهو كله على دماغنا احنا .. مواصلات واكل وشرب ولبس

نااااااااااااار يا حبيبي ناااااااااااااااار

ربنا يرحمنا

ونتيجة للكلام اللي فات ان المواطن المصري خلاص مبقاش منه أي أمل.. لا عنده سنس ولا قادر يلمس

ولا مقدر كمان علاوة يوليو ولا عارف يتعلم

ومش فالح غير في الكلام وخلاص

فانا بطالب بخصخصته .. جايز يلاقيله حد يعرف يظبطه كدا

واهو كله هيبقى اهون من العيشة ديه

حاجة أخيرة .. بس علشان محدش يدخل يقوللي مهما عملت هتفضل مصر

وبردو بنحبها .. وان انا من الفئة القليلة اللي بتشوه صورتها

والله لو مكنتش بحبها مكنتش هتكلم عن اللي بيحصل فيها

بس للاسف .. ان الموضوع اختلط عند ناس كتير أوي وبقينا نجمع بين مصر وبين النخبة الحاكمة

وانتقادهم يعني انتقاد مصر

هم دول مصر .. وهم دول احنا

: تحديث

الكتاب الصحافيون شنوا هجوما حادا ضد الكويت وكأنهم اكتشفوا ـ فجأة ـ ان »للمواطن المصري كرامة« بعد ان عودتهم حكومتهم على ان تسعيرة »المصري الغلبان« حين يموت في حادث قطار هو تعويض اهله بـ »2000 جنيه« ـ أي ما يعادل مائة دينار كويتي أو ثلاثمائة دولار امريكي أي ما يساوي سعر غسالة كورية في السوق الحرة بمطار القاهرة

منقول من جريدة كويتية

آلـ كارمازوف

أولا ..سلامُ عليكم .. وحشتوني جدا .. بشكر جدا كل الناس اللي سألت عليا وانا غايبة الفترة اللي فاتت

الحمد لله هي بس شوية ظروف وفضيت .. ورجعت من تاني

ثانيا .. محبتش أرجع بعد الغيبة الطويلة بايدى فاضية كان نفسي اكتب حاجة عن الغلاء الفاحش او عن التعذيب والاعتقالات أو عن اللي بيحصل حتى في فلسطين

أي حاجة ..

بس لقيت مقال جامد جدا قدامي .. حبيت تقروه معايا

المقال منقوووووووووووول

بسم الله الرحمن الرحيم

كانوا إثنين أو ثلاثة أو أربعة أخوة غير أشقاء.. لا أتذكر ..جميعهم أخوة بالتبني .. احتضنهم فتوة جاهل ليكونوا عصى في يده لمن عصى .. ترعرعوا بين رغد العيش ورفاهية القوة.. فأبوهم المعلم كارمازوف صاحب أكبر مصنع فودكا بمدينة همبكستان بالقرب من بطرسبرج على حدود صحراء سيبيريا الحارة ..المعلم كارمازوف .. فتوة شهير عالميا ..وله في تاريخ إهانة حقوق الإنسان سجلا حافلا لا يقارن إلا مع ملك بابل .. لا صوت يعلو في المدينة فوق صوت آلــ - كارمازوف .. وذلك بعدما أوهموا أهل همبكستان أنهم قادرون على حمايتهم من أعدائهم ..هكسوس روسيا البيضاء.. ..فأسكتوا كل صوت يعلوا بالحق أو مطالبا بالحرية .. وقطعوا لسان كل من يقول.. لأ ..لظلمهم أو لجهلهم ..حتى صار أغلبية سكان مدينة همبكستان .. صم .. بكم .. عميا .. لا يفقهون .. أموات يأكلون الطعام ..و يسيرون على الأقدام و يتنكحون كالأنعام

وفي يوما لا غد له ..و من على الجانب الأخر من الحدود .. وأثناء خلود آلــ كارمازوف في النوم كالعادة حتى الظهيرة .. أمر موشي خرشوبف قائد قواد جيش هكسوس روسيا البيضاء.. قوته المدججة بأحدث الأسلحة باجتياح همبكستان وتدميرها تدميرا .. وسبي رجالها .. واستحياء نسائها .. فساحوا في البلاد تدميرا.. يمزقون أشجارها .. ويهدمون صوامعها .. ومدارسها ..فستيقظ الأخوة كارمازوف على صريخ أهل همبكستان .. يبكون أبنائهم .. ويجففون دماء نسائهم .. أستيقظ آلــ كارمازوف .. خائفون مرتعدون .. فقرروا فيما بينهم التقهقر أمام هكسوس روسيا البيضاء ..مع وضع الألف من سكان همبكستان أمام تقدم الهكسوس .. حتى ينشغلون في قتلهم ... وأيضا للتخلص في نفس الوقت من أكبر عدد من رجال المدينة .. خوفا من أن ينقلبوا علي الأخوة كارمازوف بعد نكستهم أمام هكسوس روسيا البيضاء..

ويفوت يوما .. والبكاء والنحيب والدماء تغطي طرق ومزارع همبكستان ..ويفوت يوما أخر … ويوما أخر يفوت ..ولا صوت لآلــ - كامازوف غير الأكاذيب .. ويخرج المعلم كارمازوف من مخابئه المحفورة تحت أحد مخازن الفودكا المهجور بالقرب من تلال المدينة ... ويقف أمام سكان مدينة همبكستان .. وفي يده سكين بطول 9 أو 10 كيلو متر لا أتذكر .. سكين تكفي لقطع رقاب سكان المدينة جميعا ..فيهدد أهل المدينة المنكوبة ..ويأمرهم بالطاعة العمياء لأبنائه .. ويطلق صيحته الشهيرة .. لا صوت يعلو فوق صوت أبنائي .. ثم يختار كبيرهم ليكون خليفة له من بعد عمرا طويل ..

لم يدم العمر طويلا بكارمازوف الأب .. فسرعان ما تأمر عليه أبنائه … فكانوا أكثر استعجالا على قبض روح أبيهم عن عزرائيل نفسه .. فأرسلوا له من يدلك قدميه بسم زعاف .. ثم جلس كبيرهم على كرسي كارمازوف الأب يبكي .. ويردد نشيد الوداع يا كارمازوف .. يا حبيب الملايين .. الوداع .. ولم يحتفل سكان المدينة في هذه الليلة بالموسم الكبير .. ولم يأكلوا الفطير والرقاق ولا حتى الحلوى السمسمية ..

و تمضي السنين كلها استنزاف .. 6 سنوات عجاف تمضي بطيئة .. بطيئة .. ودماء آن كرانيا .. الطاهرة لم تجف بعد .. آن كرانيا.. ء تعرفونها ؟؟ .. إنها جميلة الجميلات .. أجمل فتاة بهمبكستان .. دمائها لازالت تنزف منذ اغتصابها خرشوبف أمام أعين وبصر آلــ - كارمازوف جميعا ..

لفظت الأرض دماء آن كرانيا الطاهرة .. جعلته نهرا فيضا.. لا يجف .. يجرى أمام أهل همبكستان المساكين ..وليتمثل شبحا أحمرا داكنا مخيفا ..يطير النوم من عين تولوستوي الابن الأكبر لكارمازوف .. تولوستوي الأمير المرهف .. خليفة آلــ - كارمازوف .. الخليفة الجديد .. و ليوقظ ضميره من بعد غيبوبة الظلم الطويلة .. ويعيده لرشده ..فيخلع تاج إمارة الظلم .. ويخلع ثوب الكبرياء.. ويسجد على قدميه .. طالبا العفو والمغفرة من جميلة الجميلات .. آن كرانيا .. ثم قام .. فتوضأ .. وصلى .. وكبر .. ومن ورائه .. مليون .. بل أراهم .. أكثر من مليون بطل يكبرون و يهتفون الله أكبر .. الله أكبر ..الله أكبر فوق كيد المعتدي ..و الله للمظلوم خير مؤيدي .. أنا باليقين وبالسلاح سأفتدي .. بلدي ونور الحق يسطع من يدي ..

وأخيرا ..ابتسمت آن كرانيا ابتسامتها الساحرة مرة أخرى .. وأختفي حملها السفح الكاذب من خرشوبف .. وركعت على الأرض ترتوي دمائها ..وتدعوا الله أن يحفظ لها أبنها ..كبير أخوة كارمازوف .. الأمير تولوستوي .. ويبعد عنه شر و مكائد آلـ - كارمازوف ..

تولوستوي أبنها الذي ولد من جديد .. ليجفف دمعها .. وليسير معها مشوار الحياة الصعب ..فأحبته .. وأحبها .. ونسي أنه كان يوما ما أميرا من آلـ - كارمازوف .. جبارا .. عتيا .. أبنا لشيطان يصنع الفودكا ليخدر أهل القرية المنكوبة ..فامتزج حبه بحبها .. و ليذكرها بحبها الأول الخالد .. البطل أهمسنوف الشهيد ..

وهناك بعيدا عن العيون ..أجتمع الأخوة كارمازوف في خيمة بصحراء سيبريا الحارة .. يخططون .. ويدبرون .. ويتأمرون .. على تولوستوي حبيب آن كرانيا .. وتنازعوا الأمر بينهم ..و قرروا الغدر بأخيهم الكبير .. أهمسنوف الثاني.. ملك الحرب والسلام .. وأعلنوا صراحة بأن من ليس معنا فهو ضدنا.. فتخاذل أحدهم .. الأميرأحمدوف بدوينوف.. مقترحا إعطاء وقت أطول لتولوستوي.. وألح على باقي آلــ- كارمازوف بضرورة تغيير النفس والكف عن أعمال الفتونة والنهب والسلب وظلم سكان همبكستان .. فلم يكد أن يكمل اقتراحه .. حتى انفجرت فيه سفينة فضائية محملة بألف طن من الديناميت ..ليدفن مع اقتراحه للأبد بصحراء سيبيريا محترقا بيد أخواته ..و ليكمل من تبقي من آلــ- كارمازوف فصول مؤامرة إغتيال الأمير تولوستوي.. الأمير التائب ..

بدأ الأخوة كارمازوف يعدون العدة لأخر فصول مؤامرة إغتيال الأمير تولوستوي .. فزار الأمير كرابنموف مدينة بطرسبرج عاصمة روسيا البيضاء وبصحبته أحد أحفاد تاجر مدينة البندقية .. رجل الأعمال الشهير الدكتور كوهينكوف .. والذي أعد له لقاء سري مع خروشوبف .. وليطلع خرشوبف على تفاصيل مؤامرة اغتيال تولوستوي عدوه اللدود .. فيبتسم خرشوبف .. ثم يضحك .. ثم يقهقه .. ويضرب بقبضته طاولة المباحثات بينه وبين كرابنموف وكوهينكوف .. ويصيح بأعلى صوته .. لبيك .. لبيك يا آن كرانيا…إليك.. إليك يا آن كرانيا .. سأعود يا آن كرانيا .. سأعود لدفء جسد ك .. أنهل من دمائك .. وأتلذذ بتعذيبك وصراخك .. سأعود يا آن كرانيا .. يا جميلة الجميلات .. سأعود بلا طلقة رصاص واحدة .. سأعود وفي يدي اليمني كرابنموف وباليسرى كوهينكوف .. فلقد رهنوا جسدك عندي هنا للأبد .. ثم شد على يد كرابنموف مؤكد على تأيد روسيا البيضاء التام لهذه المؤامرة .. بشرط مشاركة كوهينكوف للحكم مع كرابنموف بشكل رسمي .. وأن لا ينفصلا أبدا .. وأن يوضع كوهينكوف دائما ..فوق القانون .. وفوق الشرعية .. ثمنا لدوره في مؤامرة التخلص من تولوستوي.

ثلاثة أيام فقط مضت من بعد زيارة كرابنموف لبطرسبرج .. ليسقط بعدها تولوستوي ملطخا بدمائه أثناء حضوره حفل ميلاد الابن الثامن لآن كرانيا ..سقط تولوستوي أمام أعين جميع مواطني همبكستان .. سقط على الأرض الرملية .. عدة طلقات غادرة أخترقت عقله وضميره .. فصار بصره وهو يحتضر كالحديد .. فراءى شبح كرابنموف يقسم يمن الولاء ومعه كوهينكوف أمام شيطان روسيا البيضاء.. الزعيم خرشوبف .. ولكنه وقبل أن يلفظ أنفاسه الأخيرة .. سطر بدمائه على رمال صحراء سيبريا الحارقة .. إهداء لآن كرانيا .. و أمهره بتوقيع " ملك الحرب والسلام " .. إهداء يقرائه كل يوم مواطني همبكستان بكتاب تولوستوي الشهير .. " الحرب والسلام " .. ولكنهم للأسف لا يفهمون تأويله .. ولا يدركون معناه.

انتهى النقل .. وأرجو يكون وصل المعنى

:)

!! هو في إيه ؟؟

مترو الأنفـــاق

من فترة قريبة .. حوالي اسبوعين كدا سمعنا من الحكومة ان في اجراءات أمن مشددة في كل محطات مترو الأنفاق علشان تهديدات تنظيم القاعدة بتفجير بعض محطات المترو

بغض النظر بأة ان ديه لعبة الحكومة عاملاها علشان تلم اللي عايزة تلمه.. أو ان التهديدات ديه فعلا حقيقية

الله أعلم
بس أنا عايزة أتكلم عن الاجراءات المشددة ديه

أول كام يوم .. كان ظابط على عسكري جايبين طرابيزة وقاعدين جمب شباك التذاكر بيفتشوا الشنط بمنتهى الرخامة بعدها بيومين اكتشفوا ان الموضوع خطير وجابوا كام موظف تقريبا مش لاقيينلهم أي شغلانة غير الترخيم على مخاليق ربنا في منهم اللي بيغللس على الرجالة بس .. ويعدي البنات مقابل طبعا ان يسمعهم طقطوقة من الاستظراف

وفي اللي بيعدي الرجالة ويمسك شنط البنات يفتشها حتة حتة بأسلوب غبي جدا وفي اللي بينقي البنات المخمرات بس

المهم الموضوع اتطور دلوقتي .. بعض المحطات اترفعت من عليها اجراءات الأمن الصارمة ديه واكتفوا بتطبيق الاجراءات على بعض المحطات المشكوك فيها أو اللي ممكن تكون هدف للتفجيرات

زي مايكون اللي هينزل يفجر مبارك مثلا - المحطة مش حاجة تانية - مش هينزل غير من مبارك - وهكذا

فاكتفوا بكرسيين بالنهار بتبقى اسفل السلم في الظل .. واخر النهار بتبقى اعلى السلم علشان التراوة

ومش مهم .. اللي يعجبهم شكله بيعدوه .. واللي نص نص بيخلوه يفتح السوستة بتاعت الشنطة

ولا تقوللي بأة اجهزة متطورة .. ولا حتى يجيبوا كلب بلدي منظر ولا أي حاجة .. المصري هيفضل مصري

القراءة للجميع

بصراحة مخبيش عليكم .. اتاثرت أوي من الاعلانات اللي مالية الشوارع على الكباري وعلى الحيطان وفي المترو وفوق البيوت .. واعلانات على مستوى يعني مش أي كلام

ده غير الاعلانات اللي قارفـ أقصد اللي بتتذاع على التليفزيون بتاع ماما سوزان .. وبتاع يسرا وتمورة وعماد متعب

قلت مش منظر الناس تاعبة نفسها وطالعة علشان نقرا ومكلفين نفسهم اعلانات وبتاع واحنا قاعدين كنا .. ده احنا شعب فقر بصحيح .. صحيح كان المفروض يبقى مهرجان الرغيف للجميع .. ولا الشغل للجميع

بس ولا يهمكم

المهم قلت أما اروح قصر الثقافة اللي جمب البيت بما ان ده المصدر الوحيد للكتب في المنطقة وبما ان مفيش مكتبة

والمكتبة الوحيدة اتنقلت في مبنى تاني من حوالي 3 سنين ومنتظرين ماما سوزان تفضى وتيجي تقص الشريط

رحت باة قصر الثقافة .. لقيت خيمة 2 متر في 3 متر منصوبة في الجنينة .. وفيها شوية قصص طالعين من المخازن ورقهم اصفر من كتر الركنة .. وحظي كان حلو لقيت موظف هناك يعرفني .. قاللي اساسا الكتب اللي المفروض تنزل لسة ماوصلتش .. ولما توصل هيبقى يشوفني بكتابين

!!!!!!!!!!!!

اخر حاجة بأة علشان انا طولت عليكم أوي

تنسيق الثانوية العامة الخرافي ده

مش هتكلم كتير .. بس أحب اقدم التعازي للحاصلين على 96% وعمار يا مصر

.. التاج الاول

التاج الاول .. وعلشان هو الاول طبعا لازم انقي حاجة كويسة كدا تليق بمقامي


:)التاج جايلي من عند ارتعاشات .. ربنا يقدرني واردهوله


نبتدي .. باسم الله








اسم مدونتك؟


يا ساكنة القلب





لماذا اخترته..وماهي نيتك من وراء اختياره؟


اخترته زي ما قلت في اول بوست


من اسم قصيدة قريتها وعجبتني جداا


وحسيت انه بيعبر عن اي حاجة ساكنة القلب .. مصر


اصحاب .. هواجس .. اي حاجة وكل حاجة





هل فكرت في إغلاق مدونتك؟..والسبب؟


هو احنا لحقنا لسة


اعتقد لو قفلتها .. يبقى السبب الوحيد اني مشغولة ومش قادرة اتابعها


ومظنش ده يحصل الا لو اتجوزت وخلفت 10





صورتك في المدونة..رمزيتها؟


بنت جميلة رقيقة جداا

سكنت جوا قلبي من اول نظرة

ياااااا شكلي هقول شعر



لماذا دخلت عالم التدوين من الاساس؟

اول ما سمعت عن المدونات عجبتني الفكرة جدا

وحبيت ان يبقالي المكان اللي اعرض فيه اللي جوايا

حتى لو محدش هيقراه غيري

والمدونات بتدي الفرصة ديه افضل من المنتديات

اللي بتبقى متقيد فيها شوية بمقدار ثقافة اللي معاك



احلى جمله قيلت لك فى وصف مدونتك؟

اوك كان كومنت افتكر من دينا قالت انها رقيقة

وانا بضعف اوي قدام الجمل الحنينة ديه



التعليقات بالنسبه لك ..اهميتها؟

مهمة جدا طبعا

بفرح اوي لما الاقي حد منورني وبيرد عليا

بحس اني حاجة موجودة وليها قيمة

ده غير انها احيانا بتعرفني على مدونات ناس رائعة وبستفيد منها جداا



احلى بوست كتبته ...ضع اللينك ..ثم اذكر لماذا؟

انا مكتبتش كتير لسة

بس ممكن نقول
يوم مش زي أي يوم
بيفكرني بايام شفت فيها كتير واتعلمت فيها اكتر

أفضل مدونة قرأتها؟
طيب انا هستلف ردك .. اللي انت مستلفه اصلا
اي مدونة قريتها وسيبت فيها كومنت .. تبقى حلوة
:)

أفضل بوست قرأته؟ وضع لينكه؟
انا في حاجات كتير جدا قريتها وعجبتني
بس من اخر الحاجات اللي عجبتني البوست ده
كله في الافتوس كلايت
ومتسالونيش يعني ايه

حد قل ادبه فى التعليق..ايه رد فعلك؟
حد كان ناوي يتعدى حدود انا رسماها للمدونة
مسحت الكومنت بتاعه
المدونة نظيفة وهتفضل طول عمرها نظيفة
:)

أسوأ مدونة؟
منال وعلاء .. مش بطيقها

أسوأ بوست..أسوأ مدون؟
شرحه

هيحصل ايه لإيميلك لما تموتى؟
هوصي الورثة .. كل واحد يفتحه ساعة
اكيد هيتقفل لوحده

اديتى الباسوورد لحد قبل كده؟
لا مفتكرش .. بس اختي اصلا عارفة الباسوورد

كانت إيه طبيعة علاقتك بيه؟
علاقة صعبة حادة قابلة للاشتعال

اسمك؟
عبيــر

المشهور بيه وسط اصحابك؟ا
عبير .. بيرو

عمرك؟
هكمل 21 كمان شهرين

برجك؟
الميزان

مجال دراستك؟
الطب البيطري

شخصيتك نوعها إيه؟
شخصية حلزونية متقوقعة
:)

السفر بالنسبة لك؟
انا حياتي كلها سفر
ونفسي اخلص واسافر برة مصر اكمل تعليمي

المود بتاعك؟
مش غاوية نكد .. ماليش تقل عليه
بس لما بنكد بنكد اوي اوي
ربنا ما يوريكم

وقت فراغك بتعملى فيه إيه؟
نت .. قراءة .. خروج

الاكلة المفضلة؟
ممممممممممم البطاطس المقلية المقرمشة
فارم فريتس .. اي حاجة .. المهم انها بطاطس

الصفات اللي أخدتها من بابا؟
اني زمالكاوية .. وبحب السياسة
وحاجات تانية كتير

الصفات اللي أخدتها من ماما؟
الطيبة وحب الناس

اكتر ست حاجات بكرهها؟
الرخامة
الكدب
اللي بيجادل من غير علم
الكبر
الذل
واخيرا عصير القصب

الشغل بالنسبة لك؟
الخطوة الجاية ان شاء الله
وربنا يوفقني فيها واثبت نفسي

الانترنت بالنسبه لك؟
ادمــــــــــــــــــان

امرره لمين؟
سفاح كرموز
تخاريف دكتور
دكتور مستكنيص
احنا
كلمات اميرة

!! أليـس في حيـاتـنـا شـيـئا جميلا

if you think you are unhappy, look at them

if you think your job is tough, how about him?

if you think your salary is low, how about her?

If you think you don't have many friends, ask yourself if you have one sincere friend…

you think study is a burden, how about her?

when you feel like giving up, think of this man

if you think you suffer in life, do you suffer as much as he does?

if you complaint about your transport system, how about them?

if your society is unfair to you, how about her?

يوم .. بس مش زي أي يوم

صحيت الصبح الساعة ال6 صباحا .. على غير العادة .. وبالرغم من اني نايمة الساعة ال4 فجرا

ربنا ما يوريكم ولا يكتبها على حد منكم .. كان عندي قوافل بيطرية

اه منا في طب بيطري بس كلها كام شهر وابقى في الشارع .. أتخرج يعني

المهم صحيت ونزلنا ركبنا الاتوبيس .. وانطلق بينا الى بلاد الواء الواء .. أو على ما يبدو لي أنها بلاد الواء الواء

بلاد معظمها لا تقريبا كلها مش موجود على الخريطة .. كمان الخدمات والمرافق مش اد كدا

طيب مش قضيتنا

نزلت عربية تلف البلد .. يا أهالي البلد الكرام .. في قافلة بيطرية منورة عندكم .. كل اللي عنده حيوانات تعبانة يجيبها

مفيش ثواني .. والحالات ابتدت تهل

وطبعا احنا معسكرين في وسعاية كدا جمب الغيط ومتقسمين مجموعات .. ديه باطنة .. ديه ولادة .. جراحة .. وهكذا .. ولابسين البلاطي وشكلنا يفرح يعني

أنا باة كنت في مجموعة الوقاية خير من العلاج .. يعني كل مهمتنا تتلخص في رش الحيوانات اللي عندها جرب .. واللي عندها حشرات

ومعظمها كانت سليمة .. بس كتطبيق للمثل القائل .. أبو بلاش كتر منه

فده كان شغل خفيف .. وكنت فاضية وكانت فرصة كويسة امارس هوايتي المفضلة في متابعة الناس وتسجيل سلوكياتهم

أول حاجة تعامل الطلبة مع الفلاحين .. أو خلينا نعممها ونقول تعاملنا كافراد مع مجتمعات مختلفة عنا

ندي مثال : مجموعة طلبة بنات وولاد واقفين مع بعض وبيهزروا ويضحكوا وفاتحينها على الرابع

طبعا ديه كانت فرصة كويسة لاصحاب الحالات انهم يرموا كلام مش ظريف .. او انهم يتجاوزوا الحدود مع الطلبة البنات

فطبعا أنا كفرد حتى لو مقتنع باللي بعمله .. انا مش عايش لوحدي .. لازم اراعي المجتمع اللي حوالية بافكارة ومعتقداته

حاجة تانية ..وهي مهارة التعامل مع الناس .. شئ اد ايه مهم وصعب

مهم أوي الناس تاخد عني انطباع كويس .. مش بس اني شاكرة في الشغل

ممكن اكون شاطرة اوي في شغلي .. بس اتعاملت غلط .. بتعالي او سمحت بتجاوز للحدود

ممكن اكون مش بفهم اي شئ واتعاملت بذكاء

مثال : انهاردة مثلا كنا بنرش محلول في مياة بتركيز معين .. المحلول ده خلص .. طيب ايه العمل لو قلنا خلاص شطبنا ايه المنظر

قال للعامل قضيها مياة وخلاص

وكل ما ييجي حد .. والله يا حاج انت ابن حلال خلاص دا احنا يا دوب بنخلص .. والناس ماشية تدعيله وربنا يجيب الشفا على ايديك يا دكتور ووووووووووو

نظرة الناس للبنت اللي بتشتغل طبيبة بيطرية .. حتى البنات نفسهم اللي في المكان

طبعا مش مقتنعين بيها اطلاقا

ده غير الكلام من نوعية .. ياريتني كنت حمار علشان الدكتورة تكشف عليا

يااااااا اكيد طبعا خفيتي يا حلوة لما الدكتورة كشفت عليكي .. ده لمعزة

مش عارفة ده بيعكس نظرتهم للبنت وشغلها ولا انا اللي مكبرة المواضيع

الأطفال الموجودين وتأثير المكان عليهم

تلاقي عيل مكملش 3 سنين .. وساحب معزة وجاي .. وواحد تاني شايل فرختين وجاي

لو كلمته كلمة مش عاجباه ممكن تلاقي كورس شتايم اتفتح

وتلاقي العيل من دول ماشي حافي في التراب والارف .. وماشاء الله ربنا مباركله في صحته

انما لو بصيت لولد من بتوعنا .. من اللي بيخافوا يلمسوا القطة

ويشربوا اللبن الصبح .. ويلعبوا في النادي

ولو سهروا للساعة 11 تجيلهم نزلة معوية

ااااااااه انا شكلي هيست

بس كنت هتجنن واطلع شوية من الزحمة اللي في دماغي

يلا .. اروح أروق الجي بأة

اه يا زمــن العجـــايب

لو حظك حلو .. ودخلت مسابقة وسألوك

س : ماهي عجائب الدنيا السبع؟

وسعادتك جاوبت بمنتهى الثقة

ج: عجائب الدنيا السبع هي

أهرامات الجيزة *

منارة الأسكندرية *

حدائق بابل المعلقة *

تمثال زيوس *

تمثال رودس *

ضريح هاليكارناسوس *

معبد أرتيميس *

طبعا غلط .. اه غلط متستغربش

ده كان زماااااااان .. طبعا سمعت عن الاستفتاء الفظيع اللي اتعمل علشان يختاروا بيه 7 عجائب جديدة نيولوك يعني .. اشمعنى هما

:المهم العجائب ديه هي

سور الصين العظيم - مدينة البتراء في الأردن - تمثال المسيح الفادي في البرازيل - مدرج الكولوسيوم في روما - قلعة ماشو بيشو في البيرو - مدينة شيشن ايتزا في المكسيك

طبعا اهرامات الجيزة - أعجوبة الأعاجيب - خارج المنافسة

واللي لأول مرة أحترم موقف رسمي للحكومة المصرية بمقاطعة المهزلة المسماه بالاستفتاء

لان الأهرامات مش بحاجة أن يعرفها العالم .. أهرامات الفراعنة ظلت وستظر محيرة للعلماء اللي حاولو فك طلاسمها ومعرمة سرها

اهرامات الفراعنة .. اهرامات مصر

لغز سيبقى أعجوبة الأعاجيب

حلوة يا بلدي

مش عارفة ليه افتكرت الأغنية ديه أول ما شفت
الصورة ديه
بس شتان طبعا بين الأغنية لما كانت داليدا بتغنيها .. وبين الأغنية دلوقتي
بغض النظر عن أي حاجة
بس زمان كان ممكن نقول حلوة ونعديها
بس دلوقتي .. حلوة على أي أساس يعني
هي الحلاوة بالعافية يعني
أو جايز أنا مش فاهمة إيه هو المقصود بالحلاوة

اه كنا بنقول إيه صحيح
كنا بنتكلم عن الصورة
الصورة ديه بتوضح إن مصر تحتل المركز ال 36 في قائمة أفشل دول في العالم
حلوة يا بلدي
مين بأة الدول اللي تلينا في الترتيب
وبالتالي افضل من حيث الأداء
انجولا
اريتريا
موريتانيا
كرجستان

و وا وا .. حلوة يا بلدي

بسم الله .. ابتدينا

ديه أول تدوينة ليا ان شاء الله ..هتبقى حاجة كدا زي فانتازيا .. خواطر ..

وعايزة ابتديها بقصيدة بحبها جدا .. وكلماتها رائعة .. واللي انا اخترت منها اسم البلوج بتاعي

يــا سـاكنــة القـلب

بين عينيك قطوف دانية

وغصون ترسم الظل..

على أطراف ثوب الرابية

أنت..

ما أنت سوى الغيث الذي يغسل وجه الدالية

أنت..

ما أنت سوى اللحن الذي يرسم ثغر القافية

أنت لفظ واحد في لغة الشوق محدد

أنت لفظ بارز ..

من كل أصناف الزيادات مجرد

أنت للشعر نغم

أنت فجر ..

يفرش النور على درب القلم

أنت .. ما أنت؟؟

شذا .. نفح خزامي يملأ النفس رضا يمحو الألم

أنت ـ يا ساكنة القلب ـ لماذا تهجرين؟؟

ولماذا تسرقين الأمل المشرق من قلبي وعني تهربين؟

ولماذا تسكتين؟

ولماذا تغمدين السيف في القلب الذي تمتلكين؟؟

ولماذا تطلقين السهم نحوي..

سهمك القاتل لا يقتلني وحدي..

فهل تنتحرين؟؟

مؤلم هذا السؤال المر ..

نار في قلوب العاشقين

فلماذا تهجرين؟؟

أنت.. من أنت؟؟

يد تفتح باب العافية

راحة تسمح عيني الباكية

وأنا..

طفل على باب الأماني ينتظر

شاعر يشرب كأس الحزن

يدعو يصطبر

أنا نهر الأمل الجاري الذي لا ينحسر

لم أحرك مقلة اليأس

ولم انظر بطرف منكسر

أنا ـ يا ساكنة القلب ـ الذي لا تجهلين

شاعر يمسح بالحب ..

دموع البائسين

شاعر يفتح في الصحراء دربا..

للحيارى التائهين

أنا ـ يا ساكنة القلب ـ الذي يفهم ما تعني الإشارة

أنا من لا يجعل الحب تجارة

أنا من لا يعبد المال

. ولا يرضى بأن يخلع للمال إزاره

أنا من لا يبتني في موقع الذلة داره

أنا من لا يلبس الثوب لكي يخفي انكساره

أنا..

من لا ينكر الود ولا يحرق أوراق العهود

ما لأشواقي حدود

لهفتي تبدأ من أعماق قلبي

وإلى قلبي تعود

راكض..

والأمل الباسم يطوي صفحة الكون

ويجتاز السدود

راكض. .

اتبع ظلي ..

وأدوس الظل أحيانا..

وأحياناً أرى ظلي ورائي تابعاً يمنح إصراري الوقود

لم أصل بعد..

ولم ألمس يد الشمس

ولم اسمع تسابيح الرعود

راكض.

. مازلت أستشرف ما بعد الوجود

لم أزل أبحث عن حور..

وعن مجلس أنس بين جنات الخلود

لم أزل أهرب من عصري الذي يحرق كفيه..

ويرضى بالقيود

أنا ـ يا ساكنة القلب ـ فتى يهفو إلى رب ودود

لا تقولي: أنت من؟

ولماذا تكتب الشعر وعمن.. ولمن؟؟

أنا كالطائر يحتاج إلى عش على كفّ فنن

حلمي يمتد من مكة ..

يجتاز حدود الأرض

يجتاز الزمن

حلمي يكسر جغرافية الأرض التي ترسم حداً للوطن

حلمي..

أكبر من آفاق هذا العصر

من صوت الطواغيت الذي يشعل نيران الفتن

حلم المسلم ـ يا ساكنة القلب ـ

كتاب الله, والسنة, والحق الذي..

يهدم جدران الإحن

أتقولين: لماذا تكتب الشعر وعمن ولمن؟؟

أكتب الشعر لعصر هجر الخير وللشر احتضن

أكتب الشعر لعصر كره العدل وبالظلم افتتن

أكتب الشعر لأن الشعر من قلبي

وقلبي فيه حب وشجن ..

الشاعر عبـــــد الرحمـــــن العشماوي