Monday 28 July 2008

مفارقة

مش عارفة بصراحة أعلق على خبر براءة ممدوح اسماعيل مالك عبارة السلام 98 بايه 

حقيقي مش عارفة 

جاتلي حالة ذهول .. كان جوايا بيصرخ وبيبكي احنا مالناش مكان فيها 

خصوصا لما شفت ردود أفعال اقارب الضحايا 

وبعدها دفاع ممدوح اسماعيل المظلوم البرئ اللي الشعب المصري اتهمه ظلما وعدوانا 

الراجل الحر الابي الوطني اللي عنده اساطيل 

والدول بتبوس رجله علشان يروح يخلصهم من كام الف ويريحوا همهم 

المفارقة بأة اني قريت خبر هايل في الجورنال 

النيابة تقرر حبس مالك معدية مغاغة وسائق السيارة 15 يوماً

كانت تحقيقات النيابة في حادث سقوط سيارة ربع نقل من أعلي معدية جزيرة شارونه قد أكدت أن المعدية غير صالحة للملاحة وغير مرخصة للعمل كما أوضحت التحقيقات أن مرسي الجزيرة سيتهدم ويحتاج إلي عمليات تحجير وتحجيز

ولا عزاء لاي مقهور 

على رأي اللي قال 

دي بلدهم يابا

Thursday 24 July 2008

سيزون الجواز والبطيخ


اتفضلوا بألف هنا 

Friday 18 July 2008

عـــــود


عود
الفجر لسه بيبتسم بين دمعتين
عود
الفرح ممكن يتقسم على شفتين
عود
الوهم مات
والذكريات قالت لي حبك بالوجود
يا ريت تعود

.............

إحنا زمان كنا الزمان
كنا الهوا من غير هوان
كنا الأمان من غير حدود
الوهم مات
والذكريات قالت لي حبك بالوجود
يا ريت تعود
...............

عمري اللي راح
سماح سماح
يا حب أكبر من الجراح
رجع عبيرك للورود
الوهم مات
والذكريات قالت لي حبك بالوجود
يا ريت تعود
عود
الفجر لسه بيبتسم بين دمعتين
عود
الفرح ممكن يتقسم على شفتين
الوهم مات
والذكريات حبك بالوجود
يا ريت تعود


http://www.mawaly.com/file/play/34327.html

Friday 20 June 2008

هي .. والآخر




" عقبالك يا حبيبتي"

هي .. لمست في عينيه بحرا من المشاعر المتدفقة .. حزن وفرح .. خوف وأمل ...
لا أدري لماذا استوقفتني تلك النظرة .. أحسست بسهامها تهاجر من عينيه الى قلبي حاملة كل مشاعره .. برقتها .. وقسوتها


هو .. لا أدري .. شئ ما دفعني للنظر بعينيها وكأنني ألومها على ذنب لم ترتكبه بعد ..
ولكن .. أي ذنب أتحدث عنه .. اليس هذا ما تمنيته عندما تلاقت اعيننا .. من قبل حتى أن تتلامس ايدينا ..!!

آااه .. اتذكر هذا اليوم بدقة تفاصيلة وكأنه حدث بالأمس القريب ..
كنت أتاملها .. كانت البراءة تشع من عينيها لتملأ المكان من حولي
كنت مترددا وحذرا من الاقتراب منها .. خائفا عليها مني
ولكن .. شئ ما كان يدفعني ويحثني على الاقتراب ..

تلامست ايدينا .. واحسست بأن العالم يتلاشى من حولنا .. ودفعتك الى قلبي ..عندها احسست باننا وحيدين بهذا العالم
أنا وهي فقط .. انا وملاكي

كم تمنيت ان تدوم تلك اللحظة وأن أحتفظ بها في حضني الى الابد
ولكن .. دائما هناك لكن ...

هي.. سأشتاق اليك .. الى كلامك ..عتابك ..قلقك

هو.. دائما هناك لكن .. الفراق .. اتعجب حقا من أمري
احببتك .. وتمنيت فراقك

هي .. سأشتاق اليك يا والدي الغالي .. ليتني بحضنك دائما

هو .. تأكدي انني من مكان ما سأظل ارقبك بعيوني



Thursday 12 June 2008

عدنـــــــــــــــا

وحشتوني وحشتوووووني وحشتوووووني
وحشتني المدونة اللي كنت بفرغ فيها جزء من اللي جوايا
وحشني التواصل معكم
اديني رجعت تاني بعد ما كنت قررت اسيب المدونة مهجورة
شكرا بجد من قلبي لكل اللي سألوا عليا وكانوا عايزين يطمنوا
عن الغياب الغير مبرر
ان شاء الله ميكونش في غياب تاني علشان انا فضيت خالص
:)

Friday 11 January 2008

الوحدة


عجوز في الستين من عمرها .. ترتدي ملابس بسيطة

.. بيدها عكاز أصبح يشاركها الحياة منذ فترة ليست ببعيدة
أراها يوميا تتخذ من المقعد المقابل لمنزلي ملاذا لها ..

تلجأ إليه من بعد صلاة العشاء وحتى الساعة الحادية عشر

!.. يوميا بلا انقطاع

كثيرا ما كنت أشاهدها أو أراقبها من خلف نافذتي الزجاجية طالما كانت الفرصة متاحة
تجلس وحدها في صمت .. على نفس الكرسي .. مرحبة بضيفها الجديد العكاز ..

لغة حوار متبادلة فيما بين تلك العجوز والكرسي والعكاز .. لا .. ليس بمجرد حوار صامت .. انه حوار ملئ بكثير من المشاعر .. ربما الشئ الذي يتشاركونه جميعا .. الوحدة
يوميا بلا انقطاع .. حتى في الأعياد وأيام الجمع .. أشاهدها وحيدة .. تجلس في صمت .. تتأمل الناس في صمت

.. تهز رجليها يمنة ويسارا في صمت

كم من مرات مررت بجانبها .. وكم من مرات دفعني فضولي لأتحدث معها .. ولكن عن ماذا

أأسألها لماذا اختارتك الوحدة؟؟!! يالغبائي
يوميا بلا انقطاع .. إحساس بأن لغة ما قد نشأت بيننا يتزايد بداخلي

نعم وان كانت لا تراني وان كنت لا اعرفها .. فهي لغة خاصة بنا
كثيرا ما تساءلت .. أينتهي بي الحال كالعجوز .. فأتخذ من الكرسي رفيقا لشيخوختي
تساءلت .. ولكن تركت الإجابة للزمن ..
عله يكون رحيما بي .


N.B

اعتذار حار لاصدقائي المدونين عن متابعة تدويناتهم وأخبارهم

نظرا لظروف الامتحانات .. أسألكم الدعاء

Tuesday 18 December 2007

كبسولات

كبسولات مش زي بتاعت استاذنا سمير رجب .. انا فين وهو فين يعني
:D
بس هو شوية كلام في دماغي مش مترتب ومالوش علاقة ببعضه
طبعا كل سنة وانتم طيبين وعيد سعيد عليكم يارب وكلوا لحمة بس مش كتير بأة
كان نفسي اكتبلكم قبل انهاردة علشان انهاردة وقفة عرفات وكان نفسي تدعولي كلكم
بس معلش اللي يقرا بردو أمانة الدعاء
:)
****************
من يومين بقلب في التليفزيون والريموت - هو السبب - وداني على قناة
الفضائية اللبنانية LBC الــ
وكان عليها برنامج اسمه هزي يا نواعم .. طبعا واضح من اسم البرنامج الدور الريادي العظيم القيادي اللي بيقدمه وكل الكلام الجامد ده
دلوقتي بس عرفت اللبنانيين مش كانوا عارفين يختاروا رئيس ليه
اتاريهم كانوا مشغولين بيختاروا حاجة تانية
على العموم مش فارقة كله رقص
****************
في الكلية عندنا مزهقينا بان مرض حمى الوادي المتصدع قادم وبشدة في الصيف من السودان
وانه هيسبب خساير مهولة في الحيوانات وفي البني ادمين اللي هم احنا كدا
حاجة كدا على غرار انفلونزا الطيور
وافتح الجورنال من يومين بردو والاقي خبر بالبونت العريض
خفض الدعم المخصص لامصال مرض حمى الوادي المتصدع من 35 مليون الى 10 مليون جنيه
بصراحة لا تعليق
******************
الفترة اللي فاتت كان موضوع رغيف العيش وان الدعم هيتشال من عليه هو الشاغل الاكبر .. المصيبة ان عندنا في المنوفية الدقيق كان بايظ وصلاحيته منتهية فلو وصفت منظر العيش اللي لو اترمى لكلاب اعتقد هتقرف تاكله هبقى بجمل صورته
والغريب اكتر منظر الناس على افران العيش اللي بالمنظر ده لدرجة ان الناس بتجيبة بالواسطة
بجد حزينة اننا وصلنا لمرحلة العيش الحاف مش لاقيينه
فكرت لو اصحاب الافران والمخابز يعملوا اعتصام يوم واحد بس بجملة هوجة الاعتصامات اللي في البلد
كان هيبقى ايه الوضع
بس عقلي كان عاجز عن تخيل المنظر
*****************
في النهاية كل سنة وانتم طيبين