مشهد داخلي : واقفة انا وبابا في الكوريدور بتاع الشقة ( الطرقة يعني ) .. وبنتكلم
اب وبنته بأة وكدا
ها يا بابا بأة
يا بنتي بطلي صداع
يا بابا ......
وفجأة حسيت ان الارض بتترج .. ايه الوش ده
ياربي .. البيت بيقع ولا ايه
ربنا يستر ..
ولقيت كل اللي في البيت بيجري على الشباك والبلكونة
جريت انا كمان
بجد اتصدمت من اللي شفته
ايه كميات عساكر الامن المركزي ديه .. وايه العدد المهول بتاع العربيات ده
العساكر منتشرة في الشارع زي الدبان .. وقافلين الشارع .. وطايحين بالعصيان في كل اللي ماشي
ومسكو تاكسي يا عيني دشدشوه لما حاول يتحرك
معلش نسيت اقولكم انا كنت فين .. لا مش كنت على الحدود ولا حاجة
ولا في قلب غزة مثلا او مستعمرة في فيتنام
لا لا لا
انا كنت جمب مجمع الكليات النظري جامعة المنوفية
واللي حصل ده حصل لطلبة الكلية .. علشان ارتكبوا جرم بشع الا وهو ممارسة حقهم في طلب الحرية المزعومة
حرية انتخابات اتحاد الطلبة
اعترضوا على التفتيش المهين على البوابة
اعترضوا على حبس اساتذتهم في الجامعه
وعلى خطف زمايلهم الطلبة
اه يا جماعة متستغربوش احنا في 2007 .. مش في القاهرة 30 والقلم السياسي هو اللي بيعمل كدا
لما ابقى واقفة في بلكونة بيتنا .. والاقي الطلبة بتجري من جوة المجمع .. ووراهم كام مخبر من اللي هما .. يرنوهم العلقة اللي هي
وبعدين ياخدوهم في عربيات .. ده يبقى اسمه ايه
لما البنات تيجي تدخل كلياتها .. وشنطها تتفتش بطريقة في منتهى السفالة .. ده يبقى اسمه ايه
لما اقف مع بنت لابسة خمار .. واتشد علشان الوقفة معاها بقت شبهة .. ده يبقى اسمه ايه
والله مش عارفة اقول ايه ولا ايه .. بس المشهد كان يصدم بجد
واللي يصدمك اكتر .. ان ده كله شغال
والكافيتيريا اللي تحت .. الشباب والبنات زي ما هم عااااااااادي
يا عم سيبك اللي يولع يولع
الشباب اللي بيتظاهروا ماسكين نعش للحرية .. وواقفين حداد
والشباب الروش معدي جمبهم .. ايه ده هي الحرية ماتت .. محدش قاللي والله
!!!!!!!!!!!!!!!!!
واللي ماسك ايد واحدة وقاعدين يسبلوا
المشهدين كانوا في نفس اللحظة .. وتقريبا في نفس المكان مش بيفصل منهم غير كام متر
والغريب ان الاتنين عايشين في البلد ديه
حاجة تحزن والله
كان نفسي اجيب صور .. بس انا كنت واقفة بتفرج مش مستوعبة في ايه
بس هحاول اجيب قريب من الناس اللي صورت
ديه صور من اخوان اون لاين مؤقتا
28 comments:
انا مش عارف هما الطلبة عملواايه لكل ده
خايفين منهم ليه
النظام بتاعنا بيستهبل
نظام متخبط وعاجز
عايز يقمع اى صوت بينادى بالحرية
لانه حاسس ان دى هتبقى نهايته
مش بيبص للطلبة على انهم مجرد طلبة صغيرين
بيبص لهم على انهم ثوار وهيهددوا عرشه
عشان كده بيعمل فيهم كل ده
منهم لله
ان شاء الله هيجى اليوم اللى ندوق طعم الحريةفيه
وما نشوفهمش على كراسى الحكم
ونشوفهم فى السجون
جزاء لكل اللى ارتكبوه من ظلم وفساد
انا مش مستغربة من اللى بتقوليه
لأنى شفت مشاهد مشابهة لما كنت فى الجامعة
عادى جدا
انتى فى مصر يا عبلة
عجبنى اوى تصويرك للمشهدين المتناقضين
لانهم برزوا معنى ان الحكومه عرفت تزرع التفاهه فى عقول بعض الناس
وصدقينى يا دكتوره عبير معدش فى كليات فى مصر خلاص عميد الكليه بياخد أوامره من أمين شرطه فى أمن الدوله
بوست جرئ
ونقل مميز
أقولك سيبك من الطب وإشتغلى مراسله
مستقبل باهر فى إنتظارك
برافوووووو
مشهد بقي متكرر ويسد النفس ويكره الطلبه في البلد
دكتور كسلان
هم خايفين من الطلبة لانهم لسة في عزهم .. طاقة وحماس الشباب
الرغبة في التغيير
لسة مداروش في ساقية الفلوس واكل العيش والتعليم وتربية العيال وووو
امتى بس يا دكتور هييجي اليوم ده
اتاخر اوي
ghalia
يمكن اللي سببلي الذهول .. ظروف كليتي والهدوء المميت اللي فيها
فديه كانت اول مرة اشوف فيها ده
طبعا بخلاف التليفزيون والصور
النفقل الحي مختلف تماما
منوراني دايما :)
سي السيد
والله ده اللي بيحصل فعلا
والعميد مش بياخد اوامرة من امن الدولة .. لا ده بيتعين عن طريقهم
وفي كثير من الاحيان بيبقى شغال عصفورة
ويبلغ عن الطلبة بتوعه
!!!!!!!!!!!
وبالنسبة لحكاية الطب .. كدا كدا سايباني منه متقلقش
:)
coca
فعلا هو باة متكرر
بس لو سكتنا عليه .. هيبقى شئ روتيني وقاعدة
لحد امتى بقى
هنفضل ساكتين
منة للة
برغم بشاعة الحدث
الا اني ايضا لست مندهشة
ولا مصدومة
لان دا بقى هو العادي بتاع البلد عندنا
انت لو قلتي لي ان الطلبة عاملين مظاهرة
وعادي ومافيش حد بيوقفهم ولا بيسحلهم
ولا يهينهم ويقتل كرامتهم
كنت ممكن استغرب
لكن هو دا الطبيعي
وهو دا اللي لازم يحصل
اومال يسيبوا الطلبة يعملوا مظاهرات
وتكبر جواهم بذرة الاعتراض والمطالبة بالحقوق
لازم تموت من دلوقت
لازم تموت
لكن ربنا بيحيب املهم واعمالهم
وعمر كلمة الحق ما بتموت
وبتتوجد كل يوم
عودا حميدا قويا يا عبير
احسن
يستاهلو
ولازم طبعا يتفتشو
مش يمكن حد منهم يكون مخبي في شنطته ولا في جيبه دبابه
علمك علمك علمك
الامن ده عشان نقدر نعيش في بلدنا في امان وسلام
احنا في عصر ربنا مباركـ ـه
فهمتي حاجه؟؟
سلامووووز
عزيزتى عبير
السلام عليكم
اللى بيحصل ده فعلا حاجه تنرفز الأمن
مش فاضى غير لفك المظاهرات والاعتصامات والناس كلها
مكتئبه وضع البلد يحزن
كل الناس كارهه
الوضع بس فى حاله عجز
وقهر والامن نجح
فى ارهاب المتحمسين
بس الأسلوب بتاع القهر ده
حايولد انفجار
ودوام الحال من المحال
وربنا يستر
تحياتى لك
حسبنا الله ونعم الوكيل
ربنا يهدى
تحياتى
السلام عليكم
ازيك يا بيرى
عاملة ايه
انا عارف انى طبعا طبعا متأخر بس الظروف بقى
مبقاش عندى نت فى البيت وبشتغل بقالى فتره فى شغل جديد واخد كل وقتى حتى السيبر مش بعرف اروح
سامحينى بقى ومش عارف هقدر اجى تانى امتى ولو هتردى عليا يبقى فى مدونتى عشان بدخل من الشغل فى السكرته كده كل كام يوم
بخصوص البوست دا فكرتينى بكل اللى كان بيحصل ايام الجامعه
لدرجة ان الناس كانت بتبقى محضره اللافتات الاعتراضيه من قبل الانتخابات عشان عارفين اللى هيحصل
اشوف وشك بخير
كفراوي
يعني .. لحد ما ربنا يتوب علينا ويفوقنا
ما علينا
ما هي ديه المشكلة
ان بالرغم من ان الموضوع مؤسف ومحزن جدا
الا اننا بنبصله بنظرة تعود
ويمكن ملل
واحيانا بنجيب الغلط على الطلبة
فاتحولت المظاهرات واسلوب القمع اللي بنتعامل بيه معاها
شئ روتيني ممل
زيها زي اضرابات العمال وغيره وغيره
sooooooo
اه .. بحاول افهم اهو
ومتشكرة انك نورتني انه رجالة الامن علشان الامان
اتاريني بسال نفسي دول لازمتهم ايه
:)
كلمات
اسعدني مرورك جدا
وفعلا
الضغط هيولد الانفجار
بس امتى
مش باينلها انفجار خالص
الناس متسلسلة من كل ناحية
sasa
حسبنا الله ونعم الوكيل
momken
ربنا يهدي
او
يهد
حزين
special hi for u
منورني .. ويارب يوفقك في شغلك
وتطمنا عليك دايما
:)
لنا الله فى الى بيحصل فى مصر والمصريين والى بتعملو الحكومه الى بتقتل وبتموت اهم ما تملك ثروته الى بجد شبابها
لما كل ده يحصل
يبقى احنا ببساطة فى مصر
هنقول ايه
حسبنا الله ونعم الوكيل
لكن اكيد هييجى يوم كل ده يتغير ويعود الحق لاهله
ويا رب يكون اليوم ده قريب
تحياتى يا عبير
والسلام
رئيس جمهورية نفسي
شكرا لمرورك وفعلا لنا الله
ابو سويلم
شكرا ع المرور
:)
عمار يا بلدنا
عمار بجد .. مش بالامن والمناظر المحترمة دي .. لأا باللي فيها من ناس لسة بتقول هي عاوزة ايه ..
طبيعي ان اي حد يقمع ( حقهم كسلطة ) ومحدش طول الزمن احترم اللي عارضوه او عاملهم بإنسانية والتاريخ أهو طويل شرق وغرب .. لكن المصيبة تكون اذا ناموا الناس
ربنا يصحيهم على طول .
كل الود .
محمد العدوي
تحياتي .. انت جبت من الاخر فعلا
حسبي الله و نعم الوكيل
بجد التناقض الرهيب دا بيغيظني
الشباب الروش هو اللي هيبني مصر
التسبيل دا هو اللي هيجيب التقدم
!!!!!!!!!!!!
علامه تعجب كبيييييييييييييييرة
و ايدينا مرفوعه للسماااااا
و منه للللللللللللله
ربنا يحفظك يارب يا عبير
تحياتي و حبي
ربنا يكرمك يا جميل
طيب تعملي ايه لو انتي ساكنة عند الجامعة زي حجالاتي
وبتشوفي ما هو اسوا واسوا واوسوا
بجد بتشل منهم
ربنا يهديهم ويهدينا
اللى حصل دة اتكرر اكتر من مرة فى المجمع وكمان فى هندسه منوف وعندنا
هندسه شبين
وفعلا بيفتشو الطلبه تفتيش ذاتى وبيدخلو ورانا لحد المدرجات كمان ويوم ماعملو مظاهره صامته بعد اختطاف طالب من القسم عندنا بهدلو الطلبه بجد
وتانى يوم مفيش حد بيدخل من غير الكارنيه ويسلام لو طالب من الاخوان وهما عارفيه ممكن ميدخلش اصلا حتى لو معاه الكارنيه
دة طبعا غير تزوير انتخابات الاتحاد والذى منه
بجد بقت مهزله بكل معانى الكلمه
بس للاسف اتكلمنا او سكتنا النتيجه صفر
لان اللى اتكلمو اتبهدلو ومطلعوش بفايدة واللى ساكتين مخدوش حاجه من سكوتهم
يعنى بيقولولنا بالطول ولا بالعرض اللى عايزينه هوا اللى هيمشى واحنا طبعا بمزاجنا او غصب عننا هينفذو اللى هما عايزينه
Post a Comment