- اولا عايزة اقولكم حجم الماساه اللي انا فيها علشان اجي اقولكم كل سنة وانتم طيبين ووحشتوني جدا
بعد البحث والتحري على سايبرات البلد علشان الاقي سايببر
محترم قريب من البيت والمكان واسع .. لاني طبعا واقعة تحت ذل شركة الكومبيوتر اللي بغيرها .. ومش عارفة النت ناوي يرجع امتى ان شاء الله
المهم بعد الرغي ده ندخل في الموضوع
كل سنة وانتم طيبين
ورمضان كريم
:)
بعد ما عدا 10 ايام من رمضان .. بحاول استرجع ظاهرة واحدة من اللي كنا بنعملها زمان مفيش
حاسة ان كل ما الزمن بيعدي بينا كل ما المظاهر بتختفي او احساسنا بيهل بينعدم .. مش عارفة والله
بس فين لما كنا بنستعد من قبلها بكم يوم .. ونطلع انا وولاد عمي فوق السطح ونجيب الكراسات والكتب القديمة والمقصات .. وتيتا تحت بتعمللنا النشا اللي هنلزق بيه .. ده كله طبعا من ورا مامتنا لانها مش بتبقى موافقة منعا للبهدلة ..
ونجيب الخيط الطويل ونربطه من اول السطح لاخره ونعد نقص ونلزق ونسيبه علشان ينشف ونعمل فروع كتيرة وننزل نعلقها في الشارع وعلى البيت ... ياااااااااه
وبعدين جري ننزل نتجمع في بيت جدي مع كميات البلح .. علشان نعبيها في اكياس صغيرة وتتوزع قبل المغرب على الناس في الشارع وفي المسجد .. العيلة كلها متجمعة اهي .. اللي بيعبي واللي بيدبس واللي بياكل
وليلة رمضان جدي ياخدنا يشتريلنا الفانوس
فانوس صغير بلاستيك .. كل امكانياته لمبة صغيرة .. صحيح يا كان مصيرها انها بتتحرق او بتتكسر بس كان حلو اوي وحاسين بالفرحة بيه
ننزل نلعب في الشارع ونغني حاللو يا حاللو .. رمضان كريم يا حاللو
نفطر مع بعض طول الشهر الكريم ..
الله ايه ده ده المدفع هيضرب .. جري عمو ياخدنا بالعربية نروح نتفرج على الراجل وهو بيضرب المدفع .. واحنا حاطين ايدنا علة ودننا وفرحانين اوي
وبسرعة نرجع على ميعاد الفطار .. طبعا مستنيين بنتسلى بسرقة الاكل من المطبخ لحد ما جدو وبابا يرجعوا من صلاة المغرب من المسجد
بعد الاكل نتخانق مين اللي هيشيل ومين اللي هيغسل
زبسرعة نجري على التليفزيون .. نتفرج على الفوازير والف ليلة وليلة
وساعات كنا نروح نصللي التراويح ونرجع رجلنا متكسرة
بس مبسوطين
اصحى يا نايم يا نايم اصحى
ايه ده
ده عم حسب الله المسحراتي .. الراجل الجميل بجلابيته وطبلته .. ماشي في الشارع بينادي على اسامينا علشان نصحى .. اسامينا اللي مكتوبة على البيت
يااااااه .. كنت بحبه اوي
مره حدفتله ربع جنيه من البلكونة علشان يغنيلي شوية ..
اعد يغني بتاع 10 دقايق .. طبعا مش فاكرة حاجة من كلامه غير
يا عبير يا نور الصباح يا عقد لولي في الملاح باين
دلوقتي .. عم حسب الله مات .. وابنه ورث الشغلانة عنه باة يعدي بعجله يخطف الاسامي كان حد بيجري وراه
وبعدين اختفى .. مبقاش يعدي غير اول يوم رمضان واول يوم العيد علشان ياخد الكحك اجباري ويا ويلة اللي ميديلوش الكحك
ومش عارفة اذا كان بييجي لسة ولا خلاص هو كمان ..
علشان سيبنا البيت
وجدي توفى .. ومبقناش نتجمع زي زمان
بنشوف بعض في المناسبات
وكل ما ييجي رمضان .. اقول ..
قول للزمان
رمضان كريم
وكل سنة وانتم طيبين
27 comments:
صدقيني صحيتي جوايا حنين و شوق لجو اسري حميم زي اللي اتكلمتي عنه ده....
بجد مش لاقي كلام اقوله بس هي ديه الدنيا...و الحمدلله انك عشتيلك يومين كده..
كل سنه و انتي طيبه
تصدقي كنت بفكر في الموضوع دا
بس كنت بقول لنفسي اكيد احنا اللي كبرنا والاطفال لسه حاسين برمضان زي ما كنا بنحسة زمان مع اختلاف الوسائل
من يومين راجع من صلاة التراويح مع واحد صاحبي
وهو بيركن العربية لقيت بنات صغيرين بيفرقعوا صورايخ والبلكونه فوقيهم متعلق فنوس كبير شكله حلو
قعدت شوية في العربية اتفرج عليهم وعلي لعبهم مع بعض
وافتكر ايام زمان صحيح مكنتش بفرقع صواريخ او بلعب بفانوس والحاجات دي
بس كنت بحسه في الناس اللي حوليا وفي الشوارع اللي كانت بتفضل منوره طول الوقت ورمضان الشهر الوحيد اللي تلاقي في البنات ماشية في الشارع عادي في اي وقت
سواء راجيعن من صلاه التراويح او رايحن صلاه التهجد او راجيعن منها
تحس بجو من الأمن كدا
وان العالم كله بقي عيلة واحده
المهم
كل سنة وانتي طيبة
كل سنة وانتى طيبة يا عبير
رمضان ماتغيرش احنا اللى اتغيرنا والناس كلها اتغيرت
قول للزمان ارجع يا زمان
كل سنة وانتى طيبىة ياعبير
مع انها جت متاخرة
كل سنة وانت طيبة
كلامك مظبوط
انا مبقتش احس برمضان زى زمان
كل حاجة اتغيرت
حتى الاطفال
مش حاسس انهم بيفرحوا برمضان
زى ما احنا كنا بنفرح
كل سنة وانت طيبة
رمضااااااااااااااااااااااااااااااااااان كريييييييييييييييييييييييييييييييييييييييييييييم
كل سنة وانتى طيبة
قولى لزمان ارجع يا زمان
والله دى مصيبة يا عبير
تخيلى ان مظاهر رمضان كلها تقريبا انعدمت
لولا ان الواحد بيصوم والله كان ينسى اننا فى رمضان
والله الواحد كل ما يفكر فى الموضوع ده يتقهر
لكن ارجع واقول
هى جت على رمضان يعنى
ما كل حاجة اصبحت من غير مظاهر ولا شكل ولا طعم
تخيلى الى الان لم اشاهد اغنية رمضان جانا
كل سنة وانت طيبة
والسلام
ازيك يا عبير
كل سنة وانت طيبة
زي تخارف ما قال
احنا اللي اتغيرنا
كل ما بنكبر احساسنا بكل حاجة بيتغير
والدقيقة اللي بتعدي مابترجعش
كل سنة وانت طيبة
ونصيحتي لكي
تمسكي بذكرياتك قدر امكانك
çok güzel bir site.
كل سنه وانتى طيبه
فعلا الحاجات اللى قولتيها دى كلها مرت علينا واختفت من حياتنا تدريجيا
يمكن فعلا ذى ما الناس قالت ان الاطفال بتمر بيها بردة لاننا كبرنا
بس مش ذى ما كنا فعلا
كانت ايام جميله جدا وكان الواحد بيحس فعلا بايام رمضان واذاى بنعدله من قبليها بكام يوم فرحناين متشوقين بقدوم شهر كريم
أعتقد ان رمضان بيكون مختلف حسب كل سن
يعني اكيد أن الأطفال دلوقتي في رمضان بيكونوا مستمتعين
ومستنينه زي ما احنا كنا بنستناه
ممكن يكونوا بيعموا حاجات تانية أحنا ما كناش بنعملها
بس اكيد أعتقد ان فرحته جواهم
وأحنا بقي اللي اتغيرنا وكبرنا
ومابقناش بنحس برمضان الا لما تلاقيهم في البيت بيصحوكي بالليل بيقولوا يلا علشان السحور
كل سنة وأنتي طيبة
رمضان كريم
بجد مدونة جميلة جدا
وانا سعيد باول زيارة ليا
مازلت اشعر ببعض من تلك الاحاسيس ولكن على فترات متباعده
وتكون فى اوجها قبل رمضان بيوم وفى اخر يوم
كل سنه وانت طيبه
كل سنة وكل الناس والدنيا بخير يارب
عندك حق انا بزعل علشان الاولاد الصغيريين دلوقتى مشافوش الفرحة الى شوفناها
بعد السلام عليكم
حمد الله على السلامة ياعبير من الغيبة الطويلة دي
فعلا رمضان هيفضل زي ماهو بخيره و بركاته بس للأسف احنا اللي اتغيرنا
أو جايز التعب و الفساد و الغلاء بيضيعوا الاحساس بأي حاجة حلوة
أنا كنت عامل تحقيق عن الحكاية دى وأن شاء الله هأنزله قريب فى المدونة عشان تشوفوا أراء الشباب
تحياتى
وكل سنة وأنت طيبة
ياسلام عليكى ياعبير
انتى عبرتى باسلوب جميل
فعلا زمان كان له طعم تانى
كل سنه وانت طيبه
مع كل الامنيات الحلوه
تحياتى لك
كل عام وانت بخير
بوست جميل
زعلان لأني مقريتوش إلا متأخر
حقيقي كنت مستمتع جداً وانا بقراه
الذكريات الجميلة أحن ما يبقي للإنسان
تحيــــــــــــاتي
فعلا فيه حاجات كتير مبقاش ليها طعم الزينه تلاقيها بتتباع جاهزة بعد ما كانت بتتعمل بالورق وتتشبط بالرده والفانوس بقى صينى وبينور بالكهربا الناشفه(البطاريات) بعد ماكان بشمعه
يلا مش مهم
كل سنة وانتى طيبة
هو رمضان متغيرش الى اتغير الناس الى بيجى عليها رمضان طحن الناس والجرى وراء لقمه العيش خلاها تجرى وتدور على الماديات الروحيات واللمه بقيت عاده قديمه كل سنه وانتى طيبه
بعد السلام عليكم
أيه ياعبير أنتي فينك؟
هوه أنتي يابنتي لسه محلتيش مشكلتك مع شركة النت
يالا ربنا يعينك
كل سنة وأنتي طيبة وبألف صحة و سلامة
وعيد سعيد عليكي وعلي أسرتك جميعا
تحياتي
ادام الله لكم الاعياد دهورا
والبسكم من تقواه نورا
عيدكم مبارك
كل عام وانت بخير
وعيدك مبارك
كل سنة و انتى طيبة
انتى فين بقى بعد العيد
اولا كل سنة وات طيبة وبالف خير
انت فينك يا عبير
ربنا معاكي ان شاء الله
ويكون المانع خير
كل سنة وانت طيبة
منه لله اللى كان السبب فى انك تبعدى عننا كل الوقت ده
ابقى حاول تقتنصى ولو خمس دقائق فى اى مكان وتطمنينا عليك مش اكتر
ماشى يا عبير
سلام مؤقت
كل سنه وانتى طيبه
رمضان خلص من زمان انتى فين بقى
كفايه غياب وتعالى اكتبى عنوان جديد
مع ان التدوينة قديمة شويه .. بس لما قرأتها قولت لازم أعلق عليها
بصراحة لو حبيت أكتب عن رمضان
أو عن أي مناسبة أو عيد بقي يعدي عليا مش هأقول حاجة زيادة عن المكتوب هنا
بس المحد لله أتاكدت ان مش لوحدي اللي يبحس بكده
Post a Comment