كبسولات مش زي بتاعت استاذنا سمير رجب .. انا فين وهو فين يعني:D
بس هو شوية كلام في دماغي مش مترتب ومالوش علاقة ببعضه
طبعا كل سنة وانتم طيبين وعيد سعيد عليكم يارب وكلوا لحمة بس مش كتير بأة
كان نفسي اكتبلكم قبل انهاردة علشان انهاردة وقفة عرفات وكان نفسي تدعولي كلكم
بس معلش اللي يقرا بردو أمانة الدعاء
:)
****************
من يومين بقلب في التليفزيون والريموت - هو السبب - وداني على قناة
الفضائية اللبنانية LBC الــ
وكان عليها برنامج اسمه هزي يا نواعم .. طبعا واضح من اسم البرنامج الدور الريادي العظيم القيادي اللي بيقدمه وكل الكلام الجامد ده
دلوقتي بس عرفت اللبنانيين مش كانوا عارفين يختاروا رئيس ليه
اتاريهم كانوا مشغولين بيختاروا حاجة تانية
على العموم مش فارقة كله رقص
****************
في الكلية عندنا مزهقينا بان مرض حمى الوادي المتصدع قادم وبشدة في الصيف من السودان
وانه هيسبب خساير مهولة في الحيوانات وفي البني ادمين اللي هم احنا كدا
حاجة كدا على غرار انفلونزا الطيور
وافتح الجورنال من يومين بردو والاقي خبر بالبونت العريض
خفض الدعم المخصص لامصال مرض حمى الوادي المتصدع من 35 مليون الى 10 مليون جنيه
بصراحة لا تعليق
******************
الفترة اللي فاتت كان موضوع رغيف العيش وان الدعم هيتشال من عليه هو الشاغل الاكبر .. المصيبة ان عندنا في المنوفية الدقيق كان بايظ وصلاحيته منتهية فلو وصفت منظر العيش اللي لو اترمى لكلاب اعتقد هتقرف تاكله هبقى بجمل صورته
والغريب اكتر منظر الناس على افران العيش اللي بالمنظر ده لدرجة ان الناس بتجيبة بالواسطة
بجد حزينة اننا وصلنا لمرحلة العيش الحاف مش لاقيينه
فكرت لو اصحاب الافران والمخابز يعملوا اعتصام يوم واحد بس بجملة هوجة الاعتصامات اللي في البلد
كان هيبقى ايه الوضع
بس عقلي كان عاجز عن تخيل المنظر
*****************
في النهاية كل سنة وانتم طيبين
26 comments:
يسلاااام علي البرائه
بعد دا كله جايا تقولي في النهاية كل سنة وأنتم طيبين
طيب وانتي طيبة :)
ويارب العيد الجاي تكتبي بوست في مصايب اقل :)
كل سنة و انتى طيبة سعادتك
ممكن سؤال
هو انتى ف طب بيطرى ؟
كل سنه و انتي طيبه و عيد حلو عليكي يا رب
اما بالنسبه للي بيحصل قي البلد فالرد الوحيد هو زي ما انت قلتي
لا تعليق
يا كبسولاتك ياعبير
:)
بس ما تشبهيش نفسك بالجدع رجب ده انتي احسن منه ومن استفزازه مييييت مرة والله العظيم
وكل سنة وانت طيبة
محمد
كل سنة وانت طيب يارب ومنور دايما
معلش انا زودتها بس مكنتش حاسة بالعيد
بس دلوقتي حسيت الحمد لله وندمت اشد الندم
:)
كفراوي
وحضرتك طيب سعادتك
اه للاسف انا في بيطري بس عزائي الوحيد اني بكالوريوس
sally
كل سنة وانتي طيبة يا قمر
وبجد منوراني
وهنقول لا تعليق حتى اشعار اخر
:)
انونيمس
كل سنة وانت طيب وبخير
والله مجرد تريقة .. لاني زيك بالظبط بتخنق منه جدااااااا
ربنا يكرمك يارب
كل عام وانت بخير
ومصر زى ماهى
كل سنة وأنتى طيبه يا عسل
السلام عليكم
كل سنة وانتى طيبة
ومتزعليش اوى علشان مش بقينا لاقين العيش الحاف
دة لسة فى حاجات كتير فى انتظارنا
احناجيل محظوظ اوى عى فكرة وهنشوف حاجات كتيييييير
استعدى بقى للقادم
وودعى بقى احزانك لانها لن تفيد فى المستقبل
تحياتى
أولا كل سنة وحضرتك طيبة وبخير
ثانيا واضح إن حضرتك متعرفيش إن فيه هدف قومي دلوقتي ألا وهو
تخفيض عدد الشعب
أصل الأكل قليل
ومفيش فلوس علشان يدفعوا رواتب الـ .............. لا داعي لذكر الأسماء
فمرة يخفضوا العدد في عبارة
وكام مرة في عربة قطر مرة تولع ومرة مش عارف ايه وهكذا
ومرة يقولوا هنشيل الدعم
ومرة يقولوا هنغلي رغيف العيش
وهكذا واللي عندو اقتراحات يمسك ................ أعصابه طبعا
وجزاكم الله خيرا
وكل سنة وإنتي طيبة
كل سنة وانتى بالف خير
انتى زعلانة من هزى يا نواعم
امال بقى ميلودى تحارب الملل
تبقى اية بس
e7na
كل سنة وانت طيب
ومصر احسن من اللي هي فيه
___________________
الحشري
وسعادتك طيب وبخير
_______________________
no chance
كل سنة وانت بخير
ومتقلقش انا عندي امل كبير اوي ان شاء الله في مستقبل افضل
ودع التشاؤم قبل ما تودع الاحزان
_____________________
bedo
كل سنة وانت طيب
اتاريهم بيحاولو يحلوا مشكلة الكثافة السكانية
وبردو البيوت اللي بتتهد لزوم الوسعة ما بين الناس
______________________
ايوية
كل سنة وانتي طيبة يا قمر
وعندك حق اعلانات الملل ديهه بتجيبلي شلل رباعي وثماني
ووووو
كفاية احسن فقدت النطق
كل سنه وانت طيبه
وكل حبايبك واسرتك بخير
كبسولاتك اقوى من كبسولات سمير عجب
حاجه توجع القلب
النهارد فى المصرى اليوم
اكتشفوا 3 مواطنين بمصابين
بالملاريا الخبيثه بلد مافيش
فيها حاجه عدله او تفرح
ربنا يجازى اللى كان السبب
وادى اخره الاعلام الريادى
لهلوبه فى الهز
ربنا يصلح حالنا
ويولى امرنا لمن يتقى الله
وحسبى الله ونعم الوكيل
سلاااااام
طيبين منين بعد الكبسولات ..
كل سنة وانت طيبة
السلام عليكم
كل سنة و إنت طيب يا جميل
حاجات غريبة فعلا
اما رغيف العيش
بجد حاجة صعبة جدا
فعلا العيش شكله اسمر
الدقيق فاسد
و بيوقوا القمح مسرطن
بس و لو
الشعب المصري
حديد
و الله ربنا يحفظه يارب
و يحفظك و ويوفقك يا جميل
و مستنين كبسولات تانية
هاااااااايلة بجد
:)
اللى بيحصل ده مالوش غير رد واحد
حسبى الله ونعم الوكيل ولك الله يا شعب مصر
سنه جديده
عليكى سعيده
وكل سنه وانت طيبه
سلاااااامى
مين سمير رجب ده ؟؟؟؟ مدون زميييل يعنى
ياستى انتى احسن من الف رئيس تحرير
انتى رائيسه تحرير دار التدوين للطبع والنشر
وكبسولاتك راوعه
استمتعت جدا بيها
وكل سنه وانتى طيبه ومتالقه
تحياتى
رائع يا عبير...,
بس انا لسه مستني البوست الجديد..,
:)
كلمات
كل سنة وانتي طيبة ودايما بخير يارب
ومش الملاريا بس ده انفلونزا الطيور كمان
ربنا يرحمنا
-------------------------
محمد العدوي
اكيد طيبين لو مكناش طيبين مكانش ده باة حالنا
__________________________
والقادم اجمل
ولاء .. كل سنة وانتي طيبة يا قمر
ايوة ياعم ناس فاضية باة وناس مطحونة اللهم لا حسد
:D
بندقة
كل سنة وانتي بخير
ولنا الله
_______________
momken
ربنا يخليك .. وكل سنة وانت طيب
___________________
kareem sadek
ربنا يخليك يا كريم
:)
هي القناة ديه علطول كده
كل ما يحصل حاجة في لبنان واجيب عليها عشان أشوف ايه اللي حصل الاقيها في عالم تاني
أما بخصوص رغيف العيش فاحنا خلاص بما اننا تنازلنا عن أدميتنا هيتعمل فينا أي حاجة وهنتعامل معاملة الحيوانات أو أسوء حتي
كلام جامد وفي الصميم
قلبت علينا المواجع
على العموم وانتي طيبه
همسه
Post a Comment